जळगाव मिरर | १२ ऑक्टोबर २०२३
सध्या विधानसभा अध्यक्षांसमोर राज्यातील शिवसेनेच्या आमदार अपात्रेबाबतची सुनावणी पार पडत आहे. तर गेल्या अनेक महिन्यापासून राज्यात मुख्यमंत्री पदाबाबत अनेक दावे प्रतिदावे होत असतांना राजकीय वातावरण तापत असून शरद पवारांनी अजित पवार स्वप्नात देखील मुख्यमंत्री होवू शकत नाही असे वक्तव्य केल्यानंतर अनेक नेते आता दावे करू लागले आहे. शिंदे गटाचे आ.संतोष बांगर यांनी देखील मोठ वक्तव्य केले आहे.
राष्ट्रवादीचे नेते अजित पवार यांच्या बंडानंतर राज्याचे राजकीय समीकरण बदलून गेले आहे. अजित पवार यांच्या एन्ट्रीनंतर एकनाथ शिंदे यांचे मुख्यमंत्रीपद धोक्यात आले असून लवकरच दादा मुख्यमंत्री होणार असल्याच्या चर्चा राजकीय वर्तुळात रंगल्या आहेत. या चर्चा सुरू असतानाच शिंदे गटाचे आमदार संतोष बांगर यांनी मोठे भाकित केले आहे.
“जोपर्यंत इच्छा आहे, तोपर्यंत एकनाथ शिंदे यांनीच मुख्यमंत्री राहावे अशीच आमची इच्छा असल्याचे संतोष बांगर म्हणाले. तसेच यापुढे २० वर्ष तेच मुख्यमंत्री राहणार असल्याचा दावाही बांगर यांनी यावेळी केला.दरम्यान, यावेळी बोलताना आमदार बांगर यांनी उपमुख्यमंत्री देवेंद्र फडणवीस यांच्याबद्दलही मोठे विधान केले आहे. देवेंद्र फडणवीस यांचे काम खूप चांगले आहे. पक्षाचा आदेश आल्यास त्यांनाही केंद्रात जावे लागेल.. असे संतोष बांगर म्हणाले.
