मुंबई : वृत्तसंस्था
शिवसेनेमध्ये गेल्या दोन महिन्यापासून बंडखोरी झाल्याने शिवसेनेची मोठी वाताहात झाली आहे. शिवसेनाप्रमुख बाळासाहेब ठाकरे यांच्या विचाराने आम्ही निर्णय घेतला असं बंडखोर सांगत आहे. मात्र, शिवतीर्थावर बाळासाहेबांच्या स्मारकाजवळ असलेले गुलमोहराचे झाड कोसळल्याची घटनासमोर आली आहे. विशेष म्हणजे, हे झाड बाळासाहेबांनीच लावलं होतं.
मुंबईमध्ये पावसाने धुमशान घातले आहे. पुढील दिवस मुसळधार पावसाचा इशारा देण्यात आला आहे. अशातच शिवसेनाप्रमुख बाळासाहेब ठाकरे यांच्या स्मारकाजवळ असलेले गुलमोहराचे झाड कोसळले आहे. रविवारी मध्यरात्री हे गुलमोहराचा झाल उन्मळून पडले. मुसळधार पावसामुळे रविवारी रात्री ११.३० वाजेच्या सुमारास हे झाड कोसळले असल्याची माहिती समोर आली.
गुलमोहराचे जे झाड कोसळले ते बाळासाहेबांनीच लावलेले होते. झाड कोसळल्यामुळे स्मृतीस्थळाच्या कुंपणाचे नुकसान झाले आहे. घटनेची माहिती मिळताच शिवसेनेच्या नेत्या आणि माजी महापौर किशोरी पेडणेकर स्मृतीस्थळावर पाहणी करता दाखल झाल्या आहेत. पालिकेचे कर्मचारी स्मृतीस्थळावर दाखल झाले आहे. कोसळले झाड बाजूला करण्याचे काम सुरू आहे.
विशेष म्हणजे, एकीकडे बाळासाहेबांनी रक्ताचे पाणी करून शिवसेना सारखे वटवृक्ष उभे केले. आज त्याच शिवसेनेमध्ये मोठी बंडखोरी झाली आहे. ५० पेक्षा जास्त आमदारांनी बंडखोरी करून वेगळा गट स्थापन केला असून भाजपसोबत सरकारही स्थापन केले आहे. बंडखोर गटाकडून आम्ही बाळासाहेबांचे शिवसैनिक असल्याचे सांगितले जात आहे. त्यामुळे शिवसेना कुणाची असा प्रश्नच उपस्थितीत झाला आहे. अशातच बाळासाहेबांनी लावलेले गुलमोहराचे झाड उन्मळून पडल्याची घटना समोर आली आहे.
