जळगाव मिरर | ९ जून २०२५
जळगाव शहरातील मास्टर कॉलनीतील कसाई गल्लीत कचरा संकलित करणाऱ्या मनपाच्या वाहनात गोवंशाची कत्तल करुन त्याच्या शिंगासह जबडा आणि कातडे फेकल्याचा प्रकार रविवारी दुपारच्या सुमारास उघडकीस आला. ते वाहन हिंदूतत्ववादी संघटनांनी अडविल्यानंतर पोलीस ठाण्यात आणण्यात आले. याठिकाणी मोठ्या प्रमाणात जमाव जमल्याने तणावाचे वातावरण निर्माण झाले होते. याप्रकरणी सायंकाळी उशिरा गुन्हा दाखल करण्यात आला आहे.
सविस्तर वृत्त असे कि, बकरी ईद निमित्त कुर्बानी दिली जात असल्याने दि. ७ ते दि. ९ रोजी पर्यंत वेगवेगळ्या भागात कचरा संकलित करणारे १३ वाहने देण्याचे आदेश महापालिकेच्या आरोग्य विभागाला दिले आहे. त्यानुसार वॉटर ग्रेस कंपनीचे सुपरवायझर ऋषीकेश राजेश शिंपी यांनी रविवारी सकाळी मनपाच्या कचरा संकलित करणारे (एमएच १९, एम, ९३८९) क्रमांकाच्या ४०७ वाहनावरील वरील चालक गजानन गोपाल गवळी याला ते वाहन मास्टर कॉलनीतील बॉम्बे बेकरी येथे लावून कचरा भरल्यानंतर ते वाहन कचरा डेपो येथे नेण्याबाबत सांगितले. त्यानुसार गजानन गवळी हा ते वाहन घेवून मास्टर कॉलनीत गेला. दुपारी ३ वाजेच्या सुमारास वाहन हे कचरा डेपो येथे खाली करीत असतांना त्याठिकाणी (एमएच १९, एम, ९३८५) क्रमांकाचे दुसरे वाहन देखील आले होते.
कचरा खाली करण्यासाठी आलेल्या दोघ वाहनांमध्ये चालकांना कोणतरी अज्ञात व्यक्तीने कच्चे मांस, वेगवेगळ्या आकाराची शिंगे, जाड कातडे आणि जनावरांचा जबडा फेकल्याचे दिसून आले. त्यांनी तात्काळ घटनेची माहिती तालुका पोलिसांना दिल्यानंतर पोलिस त्याठिकाणी आले. त्यांनी ते दोघ वाहन तालुका पोलिस ठाण्यात आणले. वाहनात असलेल्या गोमांसाची तपासणी करण्यासाठी पशुवैद्यकीय अधिकारी संजय धांडे, पशुधन विकास अधिकारी डॉ. अतुल नेहते यांना पाचारण करण्यात आले. त्यांनी वाहनातील गोमांसाचे तुकडे तपासणीसाठी घेतले असून त्याची तपासणी केली जाणार आहे. कचरा संकलित करणाऱ्या वाहनातून गोमांसाची विल्हेवाट लावली जात असल्याची माहिती मिळताच शहरतील हिंदूत्ववादी संघटनांनी तालुका पोलीस ठाण्यात धाव घेतली. त्यामुळे याठिकाणी तणावाचे वातावरण निर्माण झाले होते.
