जळगाव मिरर | २५ मार्च २०२५
राज्यातील दौंड शहरात मृत अवस्थेत अर्भके सापडल्याने मोठी खळबळ उडाली आहे. यामध्ये साधारणतः दहा ते अकरा अर्भक असण्याची शक्यता वर्तवण्यात येत आहे. या प्रकरणी पोलिसांनी तपास सुरु केला आहे. दौंड शहरातील बोरावके नगर परिसरात नवजात बालकांचे अर्भक मृत अवस्थेत सापडले असल्याने परिसरात मोठी खळबळ उडाली आहे.
या घटनेची माहिती पोलिसांना कळताच दौंड पोलिसांनी तात्काळ घटनास्थळी भेट दिली. शहरात अर्भक सापडल्याने याच परिसरात गर्भपात केंद्र असून येथे अवैध गर्भपात होत असण्याची शक्यता व्यक्त होत आहे. हे सर्व अर्भक हे प्लास्टिकच्या डब्यात बंद केलेले असल्याचे आढळून आले आहे.
घटनास्थळी उपविभागीय पोलिस अधिकारी बापूराव दडस, सहाय्यक पोलिस निरीक्षक नागनाथ पाटील, पोलिस उपनिरीक्षक युवराज घोडके यांच्यासह कर्मचाऱ्यांनी भेट देत घटनेची माहिती घेतली. तसेच उपजिल्हा रुग्णालयांच्या डॉक्टरांना तात्काळ येथे बोलविण्यात आले. याप्रकरणी पुढील तपास पोलिसांकडून करण्यात येत आहे.
