जळगाव मिरर | २२ फेब्रुवारी २०२५
राज्यात गेल्या काही वर्षापासून अनेक विनयभंगाचे गुन्हे दाखल होत असतांना नुकतेच आता जर तुम्ही एखाद्या अनोळखी महिलेला तू मला आवडतेस असा मेसेज केला, तर तुम्हाला कोर्टाकडून थेट शिक्षा होऊ शकते. महाराष्ट्रातील दिंडोशीमध्ये एका घटनेप्रकरणी कोर्टाने मोठा निर्णय दिला आहे. अनोळखी महिलेला तू खूप सुंदर दिसतेस असा मेसेज पाठवणे म्हणजे विनयभंगच, असे निर्देश दिंडोशी सत्र न्यायालयाने दिले आहे.
काय आहे प्रकरण?
तक्रारदार महिलेला एक पुरुष सतत रात्री 11 ते 12.30 दरम्यान व्हॉट्सअॅप मेसेज करायचा. तो विविध फोटो आणि मेसेज करत असायचा. ‘तू सडपातळ आहे, खूप हुशार आहेस, दिसायलाही गोरी आहे. मी 40 वर्षांचा आहे, तुझे लग्न झाले आहे का? मला तू आवडतेस’, असे मेसेज हा पुरुष तक्रारदार महिलेला करत असायचा. याप्रकरणी त्या महिलेने पोलिसात तक्रार दाखल केली होती. पोलिसांनी याप्रकरणी गुन्हा नोंदवला होता.
याप्रकरणी कोर्टाने 2022 रोजी आरोपीला दोषी ठरवले होते. त्याला तीन महिने जेलमध्ये राहण्याची शिक्षा सुनावण्यात आली होती. यानंतर त्याने दिंडोशी सत्र न्यायालयात धाव घेतली. आज दिंडोशी सत्र न्यायालयात याप्रकरणाची सुनावणी करण्यात आली. यावेळी आरोपीने आपली बाजू कोर्टात मांडली. राजकीय वैमनस्यातून मला या प्रकरणात अडकवले जात आहे, असे आरोपीने म्हटले. यावर न्यायालयाने आरोपीचा युक्तिवाद फेटाळून लावला. तसेच तुझ्याकडील एकही पुरावा सुद्ध होत नाही, असे कोर्टाने त्याला स्पष्ट सांगितले.
कोर्टाने काय निरीक्षण नोंदवले?
कोर्टाने आरोपीचा युक्तिवाद फेटाळून लावल्यानंतर कोर्टाने निरीक्षण नोंदवले की, कोणतीही महिला अशाप्रकारे आरोपीला खोट्या प्रकरणात अडकवून स्वत:ची प्रतिष्ठा पणाला लावणार नाही. अनोळखी महिलेला तू सडपातळ आहे, खूप हुशार आहेस, दिसायलाही गोरी आहेस, मला तू आवडतेस, असे मेसेज करणे म्हणजे विनयभंगच आहे. हे मेसेज महिलेच्या प्रतिष्ठेला धक्का पोहोचवतात. कोणताही विवाहित पुरुष किंवा महिला अशा प्रकारचे व्हॉट्सॲप मेसेज आणि अश्लील फोटो सहन करणार नाही. विशेषतः जेव्हा मेसेज पाठवणारा आणि तक्रारदार एकमेकांना ओळखत नाहीत. हे मेसेज आणि कृत्य महिलेच्या प्रतिष्ठेला धक्का पोहोचवणारे आहे, असे म्हणत कोर्टाने फटकारले आहे.
