जळगाव मिरर | २६ जून २०२४
मुक्ताईनगर शहरातील बोदवड चौफुलीवरील उड्डाणपुलावर ट्रॅक्टर घेऊन जाणाऱ्या कंटेनरला दुचाकीस्वार ओव्हरटेक करीत होता. यात दुचाकी घसरल्याने कंटेनरच्या चाकाखाली आली. या अपघातात दुचाकीस्वाराचा जागीच मृत्यू झाला, तर मागे बसलेला तरुण जखमी झाला. ही घटना मंगळवारी दुपारी ४ वाजेच्या सुमारास घडली आहे.
मिळालेल्या माहितीनुसार, मृताचे नाव अनिल छोटू डागोर (४०, रा. रामदेवबाबानगर, मलकापूर, जि. बुलढाणा) असे आहे. अनिल डागोर हे मित्र अभिषेक टाक यांना सोबत घेऊन मलकापूरकडून भसावळकडे जात होते. दरम्यान बोदवड चौफुलीवर कंटेनरला ओव्हरटेक करीत असताना दुचाकी घसरली. क्लीनर भागाच्या मागच्या चाकाखाली दुचाकी आल्याने अनिल डागोर यांचा जागीच मृत्यू झाला, तर अभिषेक टाक थोडक्यात बचावले. ते जखमी झाले आहेत. या घटनेने महामार्गावर काही वेळ वाहतुकीची कोंडी झाली होती. घटनास्थळी मुक्ताईनगर पोलिसांनी धाव घेतली. मृतदेह मुक्ताईनगर ग्रामीण रुग्णालयात आणला. मृत अनिल डागोर मलकापूर येथे रेल्वेस्थानकाच्या साफसफाईचा ठेका घेऊन आपला उदरनिर्वाह करत होते. याबाबत मुक्ताईनगर पोलिसांत अपघाताचा गन्हा दाखल करण्यात आला आहे.