अमळनेर : विक्की उत्तम जाधव
जळगाव जिल्ह्यात वाळूमाफियांचा धुमाकूळ सुरु असतांना नुकतेच अमळनेर तालुक्यात देखील वाळूमाफियांचा धिंगाणा पुन्हा एकदा चव्हाट्यावर आला आहे. अवैध वाळूचे वाहन पकडल्याने एका तलाठ्याच्या अंगावर ट्रॅक्टर घालून त्याला जिवे मारण्याचा प्रयत्न करून इतरांना मारहाण करणाऱ्या चौघांवर गुन्हा दाखल करण्यात आला आहे.
मिळालेल्या माहितीनुसार दि. १९ रोजी सकाळी पातोंडा, दहिवद परिसरात तलाठी संदीप शिंदे, योगेश पाटील, प्रकाश महाजन, मधुकर पाटील या चौघांचे पथक गस्त घालत असताना त्यांना नांद्री गावाकडून दहिवदकडे एक निळ्या रंगाचा वाळूने भरलेले ट्रॅक्टर येताना दिसला. त्यांनी चालक योगेश संतोष पाटील याला टॅक्टर थांबवून पोलिस स्टेशनला नेण्यास सांगितले असता चालकाने नकार देऊन शिवीगाळ सुरू केली. तलाठ्यांना मारायला माणसे आणतो, असे सांगून ट्रॅक्टर सोडून पळून गेला.
थोड्या वेळात भूषण ऊर्फ सोनू देवरे चालक योगेश हे दोघे दुचाकी एमएच१९/डीएम५२८) ने आले आणि इतर दोन अनोळखी मोटरसायकल (एमएच२१/बी२९९२) ने आले. त्यांनी तलाठी पथकाला मारहाण करण्यास प्रारंभ केला. संदीप शिंदे याला खाली पाडून भूषण याने चालक योगेश याला त्याच्यावर ट्रॅक्टर घालण्यास सांगितले. योगेशने ट्रॅक्टर चालू केले तेवढ्यात इतर तलाठ्यांनी संदीप शिंदे यांना बाजूला ओढून वाचवले. लागलीच भूषण व इतरांनी तलाठी पथकाच्याच काठ्या हिसकावून पथकाला मारहाण सुरू केली. मारहाणीत शिंदे याला मांडीला व गुडघ्याला तसेच हाताच्या अंगठ्याला मार लागला. प्रकाश महाजन यांच्या दोन्ही पायाला व डोक्याला मार लागला. घाबरून तलाठ्यांनी पोलिसांना बोलावले असता चारही जण पळून गेले. तपास पोलिस उपनिरीक्षक विकास शिरोळे करीत आहेत
