जळगाव मिरर | २३ मार्च २०२६
सत्ताधारी पक्षांतील काही विद्यमान आणि माजी मंत्र्यांवरून राजकीय वाद वाढले आहेत. संजय राऊत यांनी पत्रकार परिषदेत आरोप केला की, सातत्याने भोंदू अशोक खरातला पाठिंबा देणारे 9 माजी मंत्री आणि काही विद्यमान मंत्री अद्यापही सरकारमध्ये आहेत आणि त्यांना खरातच्या काळ्या कारवायांची पूर्ण कल्पना होती.
राऊत यांनी सांगितले, “मंत्रिमंडळातील काही विद्यमान मंत्री व माजी 9 मंत्री भोंदू अशोक खरातचे कट्टर समर्थक आहेत. त्यांना खरातच्या काळ्या कारवायांची पूर्ण माहिती होती; तरीही त्यांची नावे अद्याप समोर आली नाहीत. रुपाली चाकणकर या केवळ सॉफ्ट टार्गेट होत्या, त्यांचा राजीनामा घेण्यात आला, पण खरातला राजाश्रय देणारे लोक आजही मंत्रिमंडळात बसले आहेत.”
त्यांनी यापुढे मंत्र्यांची चौकशी करून त्यांना सहआरोपी बनवण्याची मागणी केली. “मंत्रिमंडळात असूनही तुम्ही कसा अशा व्यक्तीवर विश्वास ठेवला? याची चौकशी होणे अत्यंत गरजेचे आहे,” असे राऊत म्हणाले.
संजय राऊत यांनी खास करून देवेंद्र फडणवीस यांच्यावरही निशाणा साधला. त्यांनी विचारले की, अशोक खरातला पाणी कोणत्या वर्षी कोणत्या मंत्रिमंडळाने दिले? आणि कोणते मंत्री सातत्याने त्याच्याकडे जात होते? तसेच राऊत म्हणाले की, काही विद्यमान आणि माजी मंत्र्यांनी खरातला बळ दिले आहे आणि त्यांचे फोटो अनेक नेत्यांसोबत सार्वजनिक झाले आहेत.
संजय राऊत यांनी ही घटना राज्यातील महाविकास आघाडी सरकारसाठी गंभीर आव्हान असल्याचे स्पष्ट केले आणि म्हणाले की, “राष्ट्रवादी, वारकरी संप्रदाय, बुवाबाबा या सर्वांनाही राजकारणात ओढून नेण्याची भूमिका काही राजकीय गटांनी घेतली आहे. आज बदनाम असलेला खरात उद्या भाजपमध्ये जाईल, तिथे तो शुद्ध केला जाईल.”
या वक्तव्यामुळे मंत्रिमंडळातील समर्थक आणि विरोधक यांच्यातील राजकीय तणाव आणखी वाढण्याची शक्यता व्यक्त केली जात आहे.
