जळगाव मिरर / ९ नोव्हेंबर २०२२
काही लोकांना मूल होत नाही म्हणून ते काय नाही करत पण ज्यांना होते ते थोडाही विचार करीत नाही. अशीच एक धक्कादायक घटना घडली आहे. आपल्या वीस दिवसाच्या आजारी मुलीची आईनेच गळा आवळून हत्या केल्याचा संतापजनक प्रकार अकोल्यात घडलीय. जिल्ह्यातील तेल्हारा पोलीस स्टेशन अंतर्गत वाडी आदमपूर इथे ही घटना घडली आहे. मुलगी आहे, त्यात जन्मताच तिच्या अंगावर पांढरे चट्टे आहेत, तिचं आयुष्य खराब होणार या भीतीने आईने गळा आवळून तिच्या हत्या केल्याचं समोर आलं. दरम्यान, शवविच्छेदन अहवालावरून हत्या झाल्याचे समोर आले असून तेल्हारा पोलिसांनी आई विरुद्ध खुनाचा गुन्हा दाखल करून तिला अटक केली आहे.
मिळालेल्या माहितीनुसार, अकोला जिल्ह्यातील तेल्हारा पोलीस स्टेशन हद्दीतील आदमपूर येथे वय २० दिवसांच्या चिमुकलीची ७ ऑक्टोबर २०२२ रोजी तब्येत खराब असल्याने तिला तिची आई लक्ष्मी भदे व तिचा मामा सौरव बरिंगे यांनी वैद्यकीय उपचारासाठी ग्रामीण रुग्णालयात दाखल केले. इथे वैद्यकीय अधिकाऱ्यांनी तपासणी करून त्या चिमुकलीला पुढील उपचारासाठी अकोल्याच्या शासकीय रुग्णालयात रेफर करण्यात आलेत.
दरम्यान, रुग्णवाहिकेने या २० दिवसांच्या चिमुकलीला घेऊन अकोल्यात नेले जात असता तिचा मृत्यू झाला. या प्रकरणी तिच्या मृतदेहाची वैद्यकीय तपासणी केली, या वैद्यकीय अहवालात खळबळजनक माहिती समोर आली, या अहवालात चिमुकलीचा गळा आवळून तिला मारल्याचे समोर आले. त्यानंतर या प्रकरणी खुनाचा गुन्हा दाखल करण्यात आला. पोलिसांनी तपासा दरम्यान तिच्या आईची कसून चौकशी केली, चौकशी दरम्यान आईनेच आपल्या मुलीची हत्या केल्याची कबुली दिली, दरम्यान याप्रकरणी आई लक्ष्मी गजानन भदे (रा. रामतीर्थ ता. दर्यापूर जि. अमरावती, हल्ली मुक्काम वाडी आदमपूर ता. तेल्हारा जि. अकोला.) हिच्या विरुद्ध खुनाचा गुन्हा दाखल करून तिला अटक करण्यात आली. पुढील तपास सहाय्यक पोलीस निरीक्षक ज्ञानोबा फड यांच्या मार्गदर्शनाखाली पोलीस उपनिरीक्षक रमेश धामोडे करीत आहेत.
लक्ष्मी भदे यांना अगोदर एक मुलगा आहे, तो मुलगा देखील मनोरुग्ण असल्याचे समजते, त्यानंतर तिला दुसरी मुलगी झाली, त्यातही जन्मताच तिच्या अंगावर म्हणजेच पाठीवर आणि छातीवर पांढरे चट्टे (डाग) आहेत. त्यामुळे मुलीचं पुढचं आयुष्य खराब होऊ शकते. या भीतीने तिची गळा आवळून हत्या केल्याचं पोलीस तपासात समोर आलंय.
