जळगाव मिरर | ६ जानेवारी २०२४
जळगाव शहरातील मेहरुण परिसरातील रामनगर परिसरातून ट्रक चोरून पसार झालेल्या समीर नसीर खान उर्फ पठाण (वय ४१, रा. पडेगाव, छावणी, छत्रपती संभाजीनगर) याला एमआयडीसी पोलिसांनी अटक केली. त्याला न्यायालयात हजर केले असता पोलिस कोठडी सुनावण्यात आली.
मिळालेल्या माहितीनुसार, जळगाव शहरातील मेहरुण परिसरातील रामनगर भागातील एका रुग्णालयासमोरून दि. ८ सप्टेंबर २०२२ रोजी जावेद लतिफ पटेल (रा.रामनगर) यांच्या मालकीचा (एमएच १९,सीवाय ४८४६) क्रमांकाचा ट्रक चोरीला गेला होता. याप्रकरणी एमआयडीसी पोलिस ठाण्यात गुन्हा दाखल करण्यात आला होता. मीरा भाईंदर पोलिस आयुक्तालयाच्या काशिमीरा गुन्हे शाखेने समीर नसीर खानकडून ही ट्रक जप्त केली.
त्यानंतर जळगाव एमआयडीसी पोलिस ठाण्याचे पोलिस निरीक्षक जयपाल हिरे यांच्या मार्गदर्शनाखाली सहाय्यक फौजदार अतुल वंजारी, छगन तायडे, राहुल रगडे, सचिन पाटील, योगेश बारी, साईनाथ मुंढे यांनी समीर खान याला अटक केली. त्याला न्यायलायता हजर केले असता पोलिस कोठडी सुनावण्यात आली.
