जळगाव मिरर | २५ फेब्रुवारी २०२५
सिगारेटचा माल देण्यासाठी जाणाऱ्या सुभाष रामराव घुगे (वय ३४, रा. अकोल, ह.मु. अयोध्या नगर) यांना हात देवून थांबवून अनोळखी इसमाने मारहाण केली. त्यानंतर त्यांच्याजवळ असलेले ५ हजार ५०० रुपयांचे सिगारेटचे पाकीट आणि त्यांच्या खिशातून हजार रुपयांची रोकड जबरीने काढून घेतली. ही घटना दि. २३ रोजी दुपारी दीड वाजेच्या सुमारास भाऊंच्या उद्यानाजवळ घडली. याप्रकरणी रामानंद नगर पोलिसात गुन्हा दाखल करण्यात आला आहे.
सविस्तर वृत्त असे कि, अकोला येथील सुभाष रामराव घुगे हे सद्या अयोध्या नगरात वास्तव्यास असून त्यांचा सिगारेट विक्रीचा व्यवसाय आहे. दि. २३ रोजी दुपारी ते (एमएच १९, डीजी ६६०५) क्रमांकाच्या दुचाकीने माल देण्यासाठी जात होते. भाऊंच्या उद्यानापासून काही अंतरावर पोहचल्यानंतर एका अनोळखी इसमाने त्यांना हात देवून थांबवले. घुगे यांनी दुचाकी थांबविल्यानंतर त्या इसमाने घुगे यांची कॉलर पकडून त्यांना मारहाण करण्यास सुरुवात केली. त्यानंतर तुझ्याकडचे पैसे मला देवून टाक नाही तर तुला मारुन टाकेल अशी धमकी त्याने दिले.
घुगे यांनी माझ्याकडे पैसे नाही असे म्हटले असता, त्या इसमाने त्यांच्या कानशिलात लगावून त्यांच्याजवळील ५० सिगारेटचे पाकीट आणि त्यांच्या खिशातील पैसे जबरदस्तीने काढून घेतले. त्यावेळी घुगे यांनी त्याला माझा माल परत कर असे म्हटल्यानंतर त्याने पुन्हा घुगे यांना बुक्क्यांनी मारहाण करीत जखमी केले. मारहाणीत जखमी झालेल्या सुभाष घुगे यांनी लागलीच रामानंद नगर पोलिसात तक्रार दिली. त्यानुसार अज्ञात व्यक्तीविरुद्ध जबरी चोरी केल्याप्रकरणी गुन्हा दाखल करण्यात आला आहे. तपास पोलीस उपनिरीक्षक प्रदीप बोरुडे करीत आहे
