जळगाव मिरर | ६ सप्टेंबर २०२५
गणेशोत्सवाच्या पार्श्वभूमीवर दहशत निर्माण करण्याच्या उद्देशाने गावठी रिव्हॉल्वर व जिवंत काडतूस बाळगणाऱ्या दोघांना स्थानिक गुन्हे शाखेच्या पथकाने वरणगाव येथे सापळा रचून जेरबंद केले. या कारवाईत अंदाजे रुपये १ लाख २९ हजारांचा मुद्देमाल जप्त करण्यात आला आहे.
आरोपींची नावे चरणसिंग उखा चव्हाण (३६, रा. चौडी, ता. भाणपूर, म.प्र.) व पंकज रतनसिंग चव्हाण (२५, रा. मोरझिरा, ता. मुक्ताईनगर, जि. जळगाव) अशी आहेत. त्यांची अंगझडती घेतली असता त्यांच्याकडून गावठी पिस्तूल, दोन जिवंत काडतुसे आढळली. यासह मोटारसायकल व दोन मोबाइलही जप्त केले. हा सर्व मुद्देमाल १ लाख २९ हजार रुपयांचा आहे.
जळगाव जिल्ह्यात काही इसम अवैध शस्त्र बाळगत असल्याची गुप्त माहिती मिळाल्यानंतर पोलिस अधीक्षक डॉ महेश्वर रेड्डी यांनी स्थानिक गुन्हे शाखेला कठोर कारवाईचे आदेश दिले होते. त्यानुसार ४ सप्टेंबर रोजी वरिष्ठ पोलिस निरीक्षक राहुल गायकवाड यांना माहिती मिळाली की, दोन इसम काळ्या-लाल रंगाच्या मोटारसायकलवर (एमपी-६८-झेडसी-३३५७) वरणगाव शहरात गावठी कट्टा घेऊन येणार आहेत. यानुसार तत्काळ पथकाने सापळा रचला व मोटारसायकलवरील या दोघांना ताब्यात घेण्यात आले.
या प्रकरणी आरोपींवर वरणगाव पोलिस ठाण्यात गुन्हा दाखल करण्यात आला आहे. ही कारवाई वरिष्ठ पोलिस निरीक्षक राहुल गायकवाड यांच्या मार्गदर्शनाखाली उपनिरीक्षक सोपान गोरे, पो.ह. यशवंत टहाकळे, प्रेमचंद सपकाळे, प्रीतम पाटील, श्रीकृष्ण देशमुख, बबन पाटील, रवींद्र चौधरी, सचिन घुगे, भरत पाटील (सर्व स्था.गु.शा., जळगाव) यांनी केली. दरम्यान या मागे आणखी काही आरोपी आहेत, का? याचाही शोध घेतला जात आहे
