जळगाव मिरर | १८ जून २०२५
जगातील सर्वात मोठा पक्ष म्हणून भारतीय जनता पक्ष स्वतःला समजतो, परंतु शक्तिशाली असल्याचा आव आणणारा पक्ष मात्र कोणालाही पक्षात प्रवेश देत आहे. आत्तापर्यंत ज्यांच्यावर भ्रष्टाचाराचे आरोप भाजपाने केले, त्यांनाच सन्मानाने पक्ष प्रवेश देऊन मंत्रिपदही दिले. आता तर भाजपने सर्व सोडून दिले आहे. ज्या व्यक्तीचा दाऊद इब्राहिमशी संबंध जोडला, त्यालाच सन्मानाने पक्षप्रवेश दिला. आता भाजप दाऊदला पक्षात प्रवेश देणार का?’ असा प्रश्न काँग्रेसचे प्रदेशाध्यक्ष हर्षवर्धन सपकाळ यांनी केला.
शिवसेना उबाठाला सोडचिठ्ठी देत सुधाकर बडगुजर यांनी नुकताच भारतीय जनता पक्षात प्रवेश केला. त्यावर प्रतिक्रिया देताना सपकाळ बोलत होते. ‘कोणाला पक्षप्रवेश द्यावा, हा त्या पक्षाचा प्रश्न आहे. परंतु हिंदुत्वाच्या गप्पा मारताना आपण काय करत आहोत, याचे भानही भाजपला राहिलेले नाही. सुधाकर बडगुजर यांनी दाऊदचा गुंड सलीम कुत्तासाठी पार्टी दिली होती, असा गंभीर आरोप भाजपचे आमदार नितेश राणे यांनी विधिमंडळात केला होता. आता मात्र बडगुजर यांनी हिंदुत्व मान्य केले, त्यांचे स्वागतच आहे असे भाजपने म्हटले आहे. उद्या दाऊदला पक्षप्रवेश देऊन त्याने हिंदुत्व मान्य केले असेच म्हणणार का,’ असे सपकाळ म्हणाले.
भाजपचे हिंदुत्व बेगडी
भाजप हा स्वतःला ‘पार्टी विथ डिफरन्स’ म्हणवतो. परंतु आज या पक्षात गुंड, मवाली, भ्रष्टाचारी यांचा भरणा झाला आहे. मुंबईतील ११९३च्या बॉम्बस्फोटातील आरोपी व दाऊदचा साथीदार इक्बाल मिर्ची याच्याशी संपत्ती व्यवहारप्रकरणी माजी मंत्री प्रफुल्ल पटेल यांच्या राष्ट्रवादी पक्षाशी भाजप सत्तेत भागीदारी करतो. प्रफुल्ल पटेल यांना वॅाशिंग मशिनमध्ये धुवून स्वच्छ करतो. भाजपचे हिंदुत्व बेगडी आहे, हे आम्ही नेहमी सांगतो, तेच आजही दिसले, असे बोलताना सपकाळ यांनी भाजपवर सडकून टीका केली.
