जळगाव मिरर | १५ जुलै २०२३
पारोळा तालुक्यातील एका शेतात काम करत असताना रानडुकराने केलेल्या हल्ल्यात दिनकर शिवाजी पाटील (रा. पळासखेडे सीम) हे जखमी झाले आहेत. ही घटना गुरुवारी दुपारी घडली.
पळासखेडे सीम येथील शेतकरी दिनकर शिवाजी पाटील व त्यांची पत्नी आशाबाई हे दोघे जण त्यांच्या शेतामध्ये निंदणी करीत होते. त्याचवेळी मोठे रानडुक्कर शेतात आले आणि दिनकर यांना धडक दिली. त्यात त्यांच्या डोक्याला आणि डोळ्याला इजा झाली. ग्रामस्थांनी त्यांना रुग्णालयात दाखल केले. गाव शिवाराला लागून वनविभागाचे खूप मोठे पडीक क्षेत्र आहे. त्यामुळे या परिसरात रानडुकरे, नीलगाय आणि हरणांचे कळपच्या कळप येऊन पिकांचे नुकसान करतात. वेळप्रसंगी शेतकऱ्यांना इजा पोहोचवतात. याबाबत वनविभागाला बऱ्याचदा सूचना देऊनही याविषयी काहीही कार्यवाही करण्यात आलेली नाही. या परिसरात प्रतिबंधक उपाययोजना करावी, अशी मागणी पळासखेडाचे सरपंच हिरालाल पाटील यांनी केली आहे.
