जळगाव मिरर / ३ एप्रिल २०२३ ।
जळगाव शहरातील गोलाणी मार्केट परिसरात तरुणाचा खून झाल्याची घटना ताजी असतांना रविवारी रात्रीच्या सुमारास एका २८ वर्षीय तरुणावर चॉपर हल्ला झाल्याची घटना रात्री घडली आहे. घटनास्थळी पोलिसांनी धाव घेत त्याला तात्काळ शासकीय वैद्यकीय रुग्णालयात दाखल केले आहे.
मिळालेली माहिती अशी कि, छत्रपती संभाजी नगर येथील विक्की सांडू यादव (वय 28, रा. मूळ छत्रपती संभाजी नगर, ह.मु. जळगाव) तरुण जळगाव शहरात कामासाठी आलेला होता. रविवारी रात्रीच्या सुमारास विकी हा संशयितासोबत टॉवर चौकात आला होता. त्यानंतर तेथून जवळच असलेल्या एका हॉटेल जवळ ते उभे असताना त्यांच्यामध्ये शाब्दिक वाद झाला. या वादाचे रूपांतर हाणामारीत झाल्याने संशयतांनी विकी यादव वर चॉपर ने वार करून त्याला गंभीर जखमी केले. या यामध्ये तरुणाच्या पोटाला गंभीर दुखापत झाली असून त्याला तात्काळ शासकीय वैद्यकीय रुग्णालयात दाखल करण्यात आले होते. या ठिकाणी त्याच्यावर प्राथमिक उपचार केल्यानंतर त्याला खाजगी रुग्णालयात हलविण्यात आले.
शहर पोलीस ठाण्यापासून हाकेच्या अंतरावरच तरुणावर चॉपर हल्ला झाल्याने एकच खळबळ माजली होती. घटनेची माहिती मिळतात शहर पोलीस ठाण्याचे पोलीस निरीक्षक विजयकुमार ठाकूरवाड यांच्यासह गुन्हेशोध पथकाने घटनास्थळी धाव घेतली. तरुणावर चॉपर हल्ला झाल्यानंतर पोलिसांनी हल्ला करणाऱ्या दोन ते तीन संशयीतांना चौकशीसाठी ताब्यात घेतले आहे. त्यांची चौकशी करून त्यांच्याविरुद्ध गुन्हा दाखल करण्याचे काम रात्री उशिरापर्यंत सुरू होते.
