जळगाव मिरर | २३ जानेवारी २०२६
काहीही कारण नसताना तिघांनी तरुण व त्याच्या मित्राला बेदम मारहाण करून दगडाने डोक्यात वार केल्याची धक्कादायक घटना शहरातील राजीव गांधी नगरात घडली आहे. या प्रकरणी रामानंद नगर पोलीस ठाण्यात तिघांविरोधात गुन्हा दाखल करण्यात आला असून पुढील तपास सुरू आहे. अक्षय शरद सकट (वय २२, रा. अर्जुन नगर, हरिविठ्ठल नगर) असे जखमी तरुणाचे नाव आहे. ही घटना दि. २० जानेवारी रोजी रात्री ११ वाजेच्या सुमारास राजीव गांधी नगर परिसरात घडली.
मिळालेल्या माहितीनुसार, अक्षय सकट हा तरुण आपल्या मित्रासह राजीव गांधी नगर परिसरात असताना तेजस लोंढे, सितेश लोंढे व गणेश लोंढे (सर्व रा. राजीव गांधी नगर) या तिघांनी काहीही कारण नसताना त्यांना शिवीगाळ करत मारहाण सुरू केली. वादाचे रूपांतर हाणामारीत झाले. यावेळी तेजस लोंढे याने रस्त्यावर पडलेला दगड उचलून अक्षय सकट याच्या डोक्यात मारला, ज्यामुळे तो गंभीर जखमी झाला.
मारहाणीनंतर जखमी अक्षय सकट याने उपचार घेतल्यानंतर दुसऱ्या दिवशी (दि. २१) रामानंद नगर पोलीस ठाण्यात तक्रार दिली. त्यानुसार संशयित तेजस संजय लोंढे, सितेश भारत लोंढे व गणेश अशोक लोंढे या तिघांविरोधात गुन्हा दाखल करण्यात आला आहे. या प्रकरणाचा तपास पोलीस हवालदार उषा सोनवणे करीत आहेत.
