जळगाव मिरर | ४ एप्रिल २०२४
नशिराबाद येथून कुहामार्गे जामनेरला दुचाकीवर येत असलेल्या दोघांना अडवून बंदुकीच्या धाक दाखवून त्यांच्याकडील ११ लाखांची रोकड लांबवण्यात आली. ही घटना बुधवारी सायंकाळी ६:४५च्या सुमारास महादेव माळ फाट्याजवळ घडली.
मिळालेल्या माहितीनुसार, जामनेर येथील राजकुमार कावडीया यांच्या मालकीच्या कोमल एजन्सीत लक्ष्मण पंढरीनाथ चौधरी व भीमराव लक्ष्मण तायडे काम करतात. बुधवारी सायंकाळच्या सुमारास ते ११ लाखांची रोकड घेऊन नशिराबादहून जामनेरला दुचाकीने येत होते. महादेव माळ फाट्याजवळ येताच मागून दुचाकीने आलेल्या दोन जणांनी त्यांना धक्का मारला. यानंतर चौधरी व तायडे हे दोघे जण खाली पडले. त्याचवेळी धक्का मारणाऱ्या दोघा जणांनी त्यांना बंदुकीचा धाक दाखविला आणि त्यांच्या हातात असलेली ११ लाख रुपयांची पिशवी हिसकावून क्षणार्धात पोबारा केला.
या कर्मचाऱ्यांनी आरडाओरड केली. परंतु वाहनांचा आवाज येत असल्याने कुणालाही त्यांचा आवाज ऐकू आला नाही. माहिती मिळताच अपर पोलिस अधीक्षक अशोक नखाते, भुसावळचे पोलिस निरीक्षक बबन जामदार, जामनेरचे पोलिस निरीक्षक किरण शिंदे, एलसीबीचे पोनि नजन पाटील घटनास्थळी पोहोचले. दरम्यान, धक्का देणाऱ्या वाहनचालकांचा शोध पोलिसांनी सुरु केला आहे.
