जळगाव मिरर । ८ डिसेंबर २०२२
जळगाव एका बँकेच्या लोन डिपार्टमेंटमधून बोलत असल्याचे सांगून सतीश काळमेघ यांना सायबर चोरट्याने तब्बल १० लाख रुपयांचा ऑनलाइन गंडा घातला होता. या प्रकरणाचा सायबर पोलिसांनी छडा लावला असून संबंधित व्यक्तीला संपूर्ण रक्कम परत मिळवून दिली आहे.
जळगावातील रहिवासी सतीश काळमेघ यांना अनोळखी मोबाइल क्रमांकावरून फोन आला. एका बँकेच्या लोन डिपार्टमेंटमधून बोलत असल्याचे सांगून तुमचा लोन हप्ता कपात झाला नाही. जर आजच ऑनलाइन हप्ता भरला नाही तर दंड भरावा लागेल, असे त्या फोनवरील व्यक्तीने काळमेघ यांना सांगितले. नंतर त्याने एका बँकेची लिंक पाठविली. त्या लिंकमध्ये काळमेघ यांनी संपूर्ण बँकेची माहिती अपलोड केली आणि काही क्षणात त्यांना त्यांच्या खात्यातून १०लाख रुपयांची रक्कम कुणीतरी काढून घेतल्याचा मॅसेज प्राप्त झाला.
सायबर पोलिसांनी घेतली लागलीच दखल !
काळमेघ यांनी क्षणाचा विलंब न करता सायबर पोलिस ठाण्यात धाव घेतली. नंतर संपूर्ण हकीकत पोलिस निरीक्षक लीलाधर कानडे यांच्यासह पोलिस कर्मचारी सचिन सोनवणे व श्रीकांत चव्हाण यांना सांगितली. सचिन सोनवणे यांनी लागलीच तत्परता दाखवत कोटक महेंद्रा बँकेशी ई-मेलवर पत्रव्यवहार करून शोध घेतला असता बँकेतून सदर रक्कम ही एसबीआय वेस्ट बंगाल येथे ऑनलाइन ट्रान्सफर झाल्याचे कळले. त्यांनी तत्काळ ९ लाख रुपयांची रक्कम गोठवून ती रक्कम वळविली. तर सचिन सोनवणे यांना १ लाख रुपयांची रक्कम ही एसबीआय बँक खात्यातून अॅक्सिस बँक वेस्ट बंगाल येथे ट्रान्सफर झाल्याचे कळाले. त्यांनी लागलीच ते अकाउंट गोठवून ती रक्कमसुद्धा वळविली. त्यानुसार सायबर पोलिसांच्या तत्परतेमुळे १० लाख रुपयांची रक्कम पुन्हा काळमेघ यांना परत मिळाली.
