धानोरा : प्रतिनिधी
चोपडा तालुक्यातील बिडगाव येथील हिरामण झावरु पाटील यांचा एकुलता एक मुलगा असलेला अशोक हिरामण पाटील वय ३५ हे अरुणाचल प्रदेश येथील युपीया येथे इंडीयन तिबेट बार्डर फोर्स ३१ बटालीयन येथे सेवेत होते. त्यांना त्यांना वीरमरण आल्याने आसाम येथील गुवाहाटी च्या सैनिक रुग्णालयात हलविण्यात आले होते.तेथे उपचार सुरू असतांना मंगळवारी सकाळी त्यांची प्राणज्योत मालवली.त्यांचे पार्थिव गुवाटीहुन विशेष विमानाने हावडा तेथून इंदोर व मग शववाहीकेने राहत्या गावी बिडगाव येथे आणुन गुरुवारी दुपारी १.३० वाजता २१ तोफांची सलामी देण्यात येवुन शासकीय इत्मामात भावपूर्ण साश्रू नैयनांनी अंत्यसंस्कार करण्यात आले. दरम्यान ग्रामीण भागातील पहिलेच शहीद ठरले असल्यामुळे परिसरातील ग्रामस्थांनी मोठ्या प्रमाणात गर्दी केलेली होती. यावेळी गर्दीवर नियंत्रण आणण्यासाठी पोलिसांना पुर्णपणे बंदोबस्त ठेवला होता.
दरम्यान आज सकाळपासूनच बिडगांव या गावी अशोक पाटील यांचे पार्थिव येणार असल्यामुळे चोपडा पासून ते धानोरा या २४ किलोमीटर अंतर आणि धानोरा पासून बिडगांव हे पाच किलोमीटर अंतर हे पूर्णतः ग्रामस्थांनी भरलेले दिसून आले. ठिकठिकाणी महामार्गावरील शाळा, कॉलेज येथील विद्यार्थ्यांनी या सैनिकाला मानवंदना दिली. तसेच ” शहीद जवान,अमर रहे।,वंदे मातरम ” भारत माता की जय अशा घोषणा देत सर्व परिसर दणाणून सोडला. बिडगांवात सकाळपासूनच स्मशान शांतता होती.सकाळी ११ वाजता अशोक पाटील यांचे पार्थिव गावात आल्याने संपूर्ण गावात शोभायात्रा काढून त्यांच्यावर दुपारी दीड वाजेला शासकीय नियमानुसार अंत्यसंस्कार करण्यात आले. यावेळी परिवारातील आई-वडील,पत्नी दोन्ही मुलं यांनी प्रचंड आक्रोश करत हंबरडा फोडला.हे दृश्य पाहून उपस्थित ग्रामस्थांनाही अश्रू अनावर झाले होते.
यावेळी आमदार लताताई सोनवणे, विधानसभेचे माजी अध्यक्ष अरुण गुजराथी,जि.प.सदस्य दिलिप पाटील,माजी जि.प सदस्य शांताराम पाटील, उपविभागीय पोलीस अधिकारी ऋषिकेश रावले, तहसीलदार अनिल गावित, पोलीस निरीक्षक किरण दांडगे तसेच वेगवेगळ्या पोलीस विभागातील कर्तव्यदक्ष अधिकारी तसेच आजी-माजी सैनिक, यांची विशेष उपस्थिती होती.दरम्यान गावातील वीर हरपल्याने बिडगांव गावात चुल पेटली नाही.
