जळगाव मिरर । १४ डिसेंबर २०२२
घरकुल घाेटाळ्यात दाेषी ठरवलेल्या माजी आमदार सुरेश जैन यांना मुंबई उच्च न्यायालयाने जामीन मंजूर केला आहे. तब्बल तीन वर्षानंतर त्यांचे बुधवारी रात्री जळगावात आगमन हाेत आहे. त्यानिमित्ताने जैन समर्थकांमध्ये कमालीची उत्सुकता निर्माण झाली असून त्यांच्या स्वागतासाठी कार्यकर्त्यांनी जाेरदार तयारी केली आहे. रेल्वे प्लॅटफाॅर्मपासून ते थेट वाहनापर्यंत रेड कार्पेट अंथरण्यात येईल.
घरकुल याेजनेतील घाेटाळ्यात माजी आमदार सुरेश जैन यांना ३१ आॅगस्ट २०१९ राेजी धुळे विशेष न्यायालयाने त्यांना शिक्षा ठाेठावली हाेती. त्यानंतर जैन यांना तब्बल तीन वर्षानंतर जामीन मंजूर झाला. त्यानंतर प्रथमच ते जळगावात दाखल हाेत आहेत. बुधवारी रात्री ८.४५ वाजता जैन यांचे राजधानी एक्स्प्रेसने जळगावात आगमन हाेईल. या वेळी सुरेश जैन यांचे सर्वपक्षातील समर्थकांची उपस्थिती राहणार आहे. गाेविंदा रिक्षा स्टाॅप, नेहरू चाैक, टाॅवर चाैक मार्गे ते ‘७ शिवाजी नगर’ येथे जातील. दाेन हजार समर्थक उपस्थित राहतील.
