जळगाव मिरर / १८ डिसेंबर २०२२
श्री संत एकनाथ महाराज यांचे सतरावे वंशज हभप योगीराज महाराज गोसावी हे भुसावळ येथील संत साहित्याचे अभ्यासक डॉ. जगदीश पाटील यांच्या निवासस्थानी आल्यानंतर त्यांचा स्वागत व सन्मान करण्यात आला.
श्रीक्षेत्र मेहूण तापीतीर येथे सुरू असलेल्या श्री संत सोपान काका समाधी सोहळ्यात आयोजित कीर्तनासाठी ते आले होते. परतीदरम्यान भुसावळमार्गे पैठणला जात असताना नाथ वंशज हभप योगीराज महाराज गोसावी यांनी डॉ. जगदीश पाटील यांच्या निवासस्थानी भेट दिली. यावेळी त्यांनी संत एकनाथ महाराज यांच्या संदर्भातील पीएचडीचा विषय, भक्ती ग्रंथ, मुक्ताई चरित्र आदी विविध विषयांवर चर्चा केली. प्रसंगी त्यांना श्री संत आदिशक्ती मुक्ताई गाथा, असे सोमेश्वर पुरातन, श्री संत एकनाथांच्या अभंगातील भक्ती अशी ग्रंथसंपदा भेट देऊन त्यांचा स्वागत व सन्मान करण्यात आला. नाथ वंशज हभप योगीराज महाराज गोसावी यांचे चरणस्पर्श घरी लागल्याने प्रत्यक्ष संत एकनाथ महाराज घरी आल्याचा आनंद झाल्याची व अनुभूती आल्याची भावना डॉ. जगदीश पाटील यांनी व्यक्त केली. यावेळी हभप चंद्रकांत महाराज साकरीकर व हभप लक्ष्मण महाराज यांनी विविध अध्यात्मिक विषयांवर नाथ वंशज योगीराज महाराज गोसावी यांच्याशी चर्चा केली. प्रसंगी गणेश महाराज शिंदे, सौ. विमलबाई पाटील व श्रद्धाभक्ती यांची उपस्थिती होती.
