गेल्या वर्षापासून सोशल मिडीयावर व आपल्या बोल्ड फॅशनमुळे नेहमी चर्चेत असलेली उर्फी जावेद आता वादात सापडत आहे. उर्फीचे फोटो आणि व्हिडिओ सोशल मीडियावरही प्रचंड व्हायरल होत असतात. विचित्र डेसिंग सेन्समुळे तिला टीकेचाही सामना करावा लागतो. अंगप्रदर्शन करणारे कपडे परिधान करत असल्याने अनेकजण तिच्यावर कडक कारवाई करण्याची मागणी करतात. दरम्यान, आता भाजपाच्या नेत्या चित्रा वाघ यादेखील उर्फी जावेदवर चांगल्याच संतापल्या आहेत. उर्फी जावेदला नंगटपणा करणारी बाई म्हणत त्यांनी तिच्या अटकेची मागणी केली आहे.
चित्रा वाघ यांनी उर्फी जावेदच्या अटकेची मागणी करणारे एक ट्वीट केले आहे. या ट्वीटमध्ये त्यांनी मुंबई पोलिसांनादेखील टॅग केले आहे. “अरे..हे काय चाललंय मुंबईत? ही बाई सार्वजनिक ठिकाणी नंगटपणा करत आहे. तिला रोखण्यासाठी मुंबई पोलिसांकडे काही कलमे आहेत की नाही? उर्फी जावेदला तत्काळ बेड्या ठोकाव्यात. एकीकडे निष्पाप महिला/मुली विकृतांच्या शिकार होताहेत. तर ही बया अजून विकृती पसरवत आहे,” अशा शब्दांत त्यांनी आपला संताप व्यक्त केला आहे.
कोण आहे उर्फी ?
उर्फी ही मूळची उत्तर प्रदेशातील लखनौची आहे. 15 ऑक्टोबर 1997 रोजी तिचा जन्म झाला. आईवडिलांच्या घटस्फोटानंतर बालपणीच ती मुंबईत आली होती. तिला दोन बहिणी आहेत. उर्फीने अभिनय क्षेत्रात येण्यापूर्वी मास कम्युनिकेशनचे शिक्षण घेतले आहे. ‘बिग बॉस ओटीटी’मुळे ती प्रसिद्धीझोतात आली. 2016 मध्ये तिला ‘बडे भैया की दुल्हनिया’ मध्ये अवनी पंतची भूमिका साकारण्याची संधी मिळाली. याशिवाय उर्फीचा ‘मेरी दुर्गा’ हा सुप्रसिद्ध शो असून यामुळे ती अतिशय लोकप्रिय झाली. याशिवाय तिने ‘बेपनाह’, ‘ये रिश्ता क्या कहलाता है’ आणि ‘कसोटी जिंदगी की’ यांसारख्या मालिकांमध्येही अभिनय केला आहे.
