जळगाव मिरर | ९ जून २०२३
राज्यात गेल्या काही महिन्यापासून महिलासह अल्पवयीन मुलीवर अत्याचाराचे प्रमाण मोठ्या प्रमाणात वाढत आहे. नुकतेच अल्पवयीन मुलीचे आक्षेपार्ह व्हिडिओ काढून तिला ब्लॅकमेल करत अठरा जणांनी अत्याचार केल्याचा धक्कादायक प्रकार उघडकीस आला आहे. सातारा पोलिसांनी याप्रकरणी सहा जणांविरोधात पोक्सो आणि आयटी कायद्यांतर्गत गुन्हा दाखल केला. यातील दोन आरोपी अल्पवयीन आहेत.
ब्लॅकमेल करीत सतत सहा महिने 18 आरोपींनी अत्याचार केल्यानंतर पालकांनी आपली तक्रार ऐकून घेतली नाही, त्यामुळे मागच्या महिन्यात घर सोडून निघून गेलेली ही मुलगी रेल्वे पोलिसांना आढळून आली. त्यांनी तिला पालकांच्या ताब्यात देण्याचा प्रयत्न केला असता त्यांनी नकार दिल्याने तिला संस्थेत दाखल करण्यात आले. अखेरीस, बुधवारी रात्री उशिरा तिच्या वडिलांनी तक्रार दाखल केल्यावर गुरुवारी सकाळपासून पोलिसांनी सहा आरोपींना ताब्यात घेतले. ऑक्टोबर २०२२ ते एप्रिल २०२३ या सहा महिन्यांत व्हिडिओवरून ब्लॅकमेल करीत आपल्यावर वारंवार अत्याचार केल्याचे पीडितेचे म्हणणे आहे. सातारा पोलिस स्टेशनचा परिसर दिवसभर आरोपींच्या कुटुंबीयांनी भरून गेला होता. सातारा, देवळाईपासून पैठणपर्यंतचे नातलग दाखल झाले होते. शाळा-महाविद्यालयात शिकत असलेल्या त्यांच्या मुलांविरोधात एका मुलीने लैंगिक अत्याचाराची तक्रार केल्याचे त्यांना पोलिसांकडून कळले होते. गुरुवारी रात्री उशिरापर्यंत पोलिसांनी सहा जणांविरोधात गुन्हा दाखल करून त्यांना अटक केली.
दहावीत शिकत असलेली ही पीडित मुलगी गैरसंगतीत सापडली होती. त्यातून तिचा आक्षेपार्ह व्हिडिओ काढत गेल्या सहा महिन्यांपासून आरोपी वारंवार अत्याचार करत होते. तिने ही बाब आपल्या पालकांना सांगण्याचा प्रयत्न केला, मात्र त्यांनी जबाबदारी झटकल्यावर मुलगी घर सोडून गेली. रेल्वेस्टेशनवर तिला पोलिसांनी ताब्यात घेऊन पालकांच्या स्वाधीन केले. मात्र, तेव्हाही पालकांनी तिचा ताबा घेण्यास नकार दिल्याने अखेरीस स्वयंसेवी संस्थेत तिला दाखल करण्यात आले. मुलीच्या जबानीत पूर्ण घटना पुढे आल्यावर संस्थेने पालकांना पोलिसांत तक्रार देण्याची सूचना केली. मात्र, मुलीची बदनामी होईल असे कारण देऊन त्यांची तक्रार घेतली नसल्याचे कळते. घाबरलेले पालकही याबाबत पुढे येण्यास तयार नव्हते. अखेरीस, बुधवारी रात्री उशिरा ही तक्रार दाखल करण्यात आली. पोलिसांनी मात्र पीडितेची सुरुवातीस तक्रार घेतली नसल्याचा आरोप फेटाळून लावला आहे. तरुणांना अटक केल्यानंतर त्यांचे नातेवाईक पोलिस ठाण्यात पोहोचले होते.
