अमळनेर : विक्की उत्तम जाधव
शहरासह तालुक्यातील दोन अल्पवयीन मुलींना पळवून नेऊन गरोदर करणाऱ्या दोन्ही आरोपींच्या मुसक्या आवळून त्यांच्यावर पोक्सो कायद्याप्रमाणे गुन्हा दाखल करण्यात आला आहे.
याबाबत पोलिसांनी दिलेली अधिक माहिती अशी की, जोशीपुरा येथे राहणारी १४ वर्षाची मुलगी २६ डिसेंबर २०२२ रोजी सकाळी १० वाजता बिस्कीट पुडा घेण्याच्या नावाने बाहेर पडून आपल्या मैत्रिणीच्या मोबाईल वरून प्रियकर विजय बारकू भिल (वय २०) याला फोन करून त्याच्यासोबत शिरपूर येथे पळून गेली. तेथून ते लखदिरपुर (ता. मोरवी गुजरात) येथे पळून गेले होते. पोलीस निरीक्षक विजय शिंदे यांना मिळालेल्या माहितीवरून पोलीस उपनिरीक्षक भैय्यासाहेब देशमुख, निलेश मोरे , नम्रता जरे यांनी दोघांना मोरवी येथून ताब्यात घेतले. वैद्यकीय चाचणीत मुलगी गर्भवती असल्याचे समजल्यावर आरोपी विजय विरुद्ध पोक्सो कायद्याप्रमाणे गुन्हा दाखल करण्यात आला असून तपास पोलीस उपनिरीक्षक योगेश ढिकले करीत आहेत.
तर दुसऱ्या घटनेत जवखेडा येथील १७ वर्षाच्या अल्पवयीन मुलीला सुरेश दयाराम मालचे (वय ३३) याने २१ डिसेम्बर २०२२ रोजी लग्नाचे आमिष दाखवून पळवून नेले होते. दोघेही सोलापूर जिल्ह्यातील करमाळा तालुक्यातील वांगी येथे पळून गेले होते. मंदिरात लग्न लावले. नंतर भडाणे (ता चांदवड जिल्हा नाशिक) येथे आले. आरोपी सुरेश याने आपल्या पहिल्या पत्नी व मुलांना बोलावून घेतले होते. पोलीस नाईक कैलास शिंदे, भूषण पाटील यांनी दोघांना चांदवड येथून ताब्यात घेतले. पोलीस उपनिरीक्षक अक्षदा इंगळे यांनी मुलीचा जबाब घेतला असता अल्पवयीन मुलगी गर्भवती असल्याचे समजले. आरोपीला पोक्सो कायद्याप्रमाणे अटक करण्यात आली असून त्याला पाच दिवसांची पोलीस कोठडी सुनावण्यात आली आहे.
