जळगाव मिरर | २३ जुलै २०२३
पारोळा तालुक्यातील मोंढाळे या गावात बंद घरातून अनोळखी चोरट्यांनी एक लाखांचा ऐवज लंपास केल्याची घटना उघडकीस आली आहे. या प्रकरणी पारोळा पोलीस स्टेशनला गुन्हा दाखल करण्यात आला आहे.
पोलिसांनी दिलेल्या माहितीनुसार, तालुक्यातील मोंढाळे येथील रहिवासी असलेले देविदास हिरामण पाटील (वय ६०) हे व्यवसायाने शेतकरी असून त्यांच्या घरातून अनोळखी चोरट्यांनी २१ जुलैच्या रात्री १० ते २२ जुलैच्या ६ वाजेच्या सुमारास घराचा कडी कोयंडा तोडून घरात प्रवेश करून कपाटातील दहा हजार रुपये रोख, हजार रुपये किमतीच्या कानातील सोन्याच्या रिंगा, पंचवीस रुपये किमतीच्या तीन बार वजनाच्या चांदीच्या साखळ्या, तसेच गावातील इतर लोकांचे चोरीस गेलेले ७५ हजार रुपयांचे सोन्या-चांदीचे दागिने,रोकड असा एकूण एक लाख सात हजार रुपयांचा मुद्देमाल अज्ञात चोरट्यांनी चोरून नेल्याची घटना घडल्याने या प्रकरणी पारोळा पोलीस स्टेशनला गुन्हा दाखल करण्यात आला आहे. तपास पोलीस उपनिरीक्षक जयवंत पाटील करीत आहे.
