जळगाव मिरर | २३ ऑगस्ट २०२३
जळगाव शहरातील बालसुधार गृहातील शौचालयात एका अल्पवयीन मुलीने गळफास घेतल्याची घटना घडली होती. त्या मुलीवर जिल्हा रूग्णालयात उपचारास सुरू असतांना मंगळवारी २२ ऑगस्ट रोजी मृत्यू झाला आहे. याप्रकरणी जिल्हापेठ पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार जळगाव येथील बालसुधार गृह जिल्हा परिविक्षा निरीक्षण गृहात अमळनेरातील पूनम भिल(वय १४) ही मुलगी होती. पूनम हिला घरी जायचे होते. परंतू तिचे वडील बाहेरगावी असल्याने तिला नेणे शक्य झाले नाही. घरी जाण्याच्या मागणीच्या दुसऱ्याच दिवशी १२ ऑगस्ट रोजी तिने शौचालयात गळफास घेतला. तिच्यावर ११ दिवस अतिदक्षता विभागात उपचार सुरू होते. अखेर मंगळवारी २२ ऑगस्ट रोजी तिची प्राणज्योत मालविली. या प्रकरणी जिल्हा पेठ पोलिस ठाण्यात अकस्मात मृत्यूची नोंद करण्यात आली आहे.
