अमळनेर : विक्की उत्तम जाधव
अमळनेर तालुक्यातील अमळगावजवळ चुकीच्या मार्गाने येवून भरधाव कारने दुचाकीला जबर धडक दिली. या भीषण अपघातात ५१ वर्षीय महिलेचा मृत्यू झाला, तर त्यांचा मुलगा दुचाकीस्वार तरूण गंभीर जखमी झाला. याप्रकरणी अमळनेर पोलिसात गुन्हा दाखल करण्यात आला आहे.
मिळालेल्या माहितीनुसार, तालुक्यातील दोधवद येथे भूषण उत्तम मोरे (भोई) हा तरूण आपल्या परिवारासह वास्तव्याला आहे. २२ ऑक्टोबर रोजी भूषण भोई हा त्याची आई बेबीबाई भोई यांच्यासोबत दुचाकी (एमएच – १९, डीएक्स – ९४७६) ने अमळगाव येथे जात असताना समोरून चुकीच्या मार्गाने येणारी कार (एमएच १८, एजे २०४६ ) ने दुचाकीला जबर धडक दिली. या धडकेत बेबीबाई यांचा जागीच मृत्यू झाला तर भूषण हा जखमी झाला आहे. त्याला उपचारार्थ खासगी रुग्णालयात दाखल करण्यात आले. याप्रकरणी राहूल भिकन भोई यांनी दिलेल्या फिर्यादीवरून कारवरील चालक विजय चुडामण धोबी (रा. अमळगाव, ता. अमळनेर) याच्याविरोधात अमळनेर पोलीस ठाण्यात गुन्हा दाखल करण्यात आला आहे. तपास पोहेकॉ विजय भोई करत आहेत.
