जळगाव मिरर | २७ नोव्हेबर २०२३
ग्रामीण भागात जबरी चोरी, मारहाण यासह घातक शस्त्र बाळगल्याप्रकरणी धरणगाव, एरंडोल व जळगाव तालुका पोलिसात दहा गुन्हे दाखल असलेल्या एरंडोल तालुक्यातील रवंजे येथील सराईत गुन्हेगार नाना उर्फ बुधा उत्तम कोळी (वय ३२) याच्यावर स्थानबद्धतेची कारवाई करण्यात आली आहे. त्याची पुणे येथील येरवडा कारागृहात रवानगी करण्यात आली आहे.
मिळालेल्या माहितीनुसार, एरंडोल पोलिस ठाण्याच्या हद्दीतील सराईत गुन्हेगार नाना ऊर्फ बुधा उत्तम कोळी रा. रवंजे बु. ता. एरंडोल याच्याविरुद्ध इतर पोलीस ठाण्यात देखील वेगवेगळ्या स्वरूपाचे दहा गंभीर गुन्हे दाखल आहेत. तसेच त्याच्यावर वेळोवेळी देखील प्रतिबंधात्मक कारवाई करण्यात आली आहे. मात्र त्याच्या वर्तवणुकीत सुधारणा होत नव्हती. त्यामुळे एरंडोल पोलीस ठाण्याचे पोलिस निरीक्षक सतिष गोराडे यांनी एमपीडीए अंतर्गत कारवाईचा प्रस्ताव जिल्हा पोलिस अधीक्षक एम. राजकुमार यांच्याकडे पाठविला होता. त्याप्रस्तावाचे अवलोकन केल्यानंतर तो प्रस्ताव जिल्हाधिकारी आयुष प्रसाद यांना सादर करण्यात आला होता. सदर प्रस्तावास जिल्हाधिकारी आयुष प्रसाद यांनी मंजूरी देत नाना कोळी याला स्थानबद्ध करण्याचे आदेश दिले. त्यानंतर पोलिसांनी त्याला तात्काळ अटक करीत त्याची पुणे येरवडा कारागृहात रवानगी केली आहे.
यांनी केली कारवाई
ही कारवाई पोलीस अधीक्षक एम. राजकुमार, अपर पोलीस अधीक्षक रमेश चोपडे, उपविभागीय पोलीस अधिकारी सुनिल नंदवाळकर, स्थानिक गुन्हे शाखेचे वरिष्ठ पोलीस निरीक्षक किसन नजन पाटील यांच्या मार्गदर्शनाखाली पोलीस निरीक्षक सतिष गोराडे, एपीआय गणेश अहिरे, पीएसआय शरद बागल, विकास देशमुख, सफौ यूनूस शेख इब्राहीम, सुनिल दामोदरे, जयंत चौधरी, ईश्वर पाटील, राजेश पाटील, अनिल पाटील, अकील मुजावर, मिलींद कुमावत, प्रशांत पाटील, पंकज पाटील यांच्या पथकाने केली.
