जळगाव मिरर | २० जून २०२४
एका १४ वर्षीय अल्पवयीन मुलीवर अत्याचार करून तिला आठ महिन्यांची गर्भवती करणाऱ्या नराधमाच्या पोलिसांनी मुसक्या बांधल्या आहेत. विशेष म्हणजे नराधम पीडितेच्या आईचा प्रियकरच निघाल्याने छत्रपती संभाजीनगर जिल्ह्यातील वाळूज महानगर मोठी खळबळ उडाली आहे.
मिळालेल्या माहितीनुसार, वाळूज परिसरातील निकिता (१४, नाव बदलले आहे) हिच्या पोटात दुखत असल्याने तीन दिवसांपूर्वी तिची आई सुनयना (नाव बदलले आहे) हिने तिला शासकीय रुग्णालयात नेले. निकिता आठ महिन्यांची गरोदर असल्याने डॉक्टरांनी पोलिसांना कळविले. तेव्हा निकिताने आठ महिन्यांपूर्वी एका तरुणाने धाक दाखवून अत्याचार केल्याचे पोलिसांना सांगितले होते. मात्र निकिताची आई सुनयना हिने तक्रार दाखल करण्यास टाळाटाळ केल्याने पोलिसांना संशय आला.
सुनयना हिला चौकशीसाठी बोलावले असता तिने पती सुभाष (नाव बदलले आहे) यांना पाठविले. सुभाष याने पत्नीसोबत पटत नसल्याचे सांगत मी घरी नसताना एक अनोळखी इसम घरी रात्री-अपरात्री येत असल्याची माहिती दिली. त्यानंतर पोलिसांनी संशयित अंकुश प्रल्हाद जाधव (३९, रा. रांजणगाव) यास ताब्यात घेतले. कसून चौकशी केल्यानंतर त्याने सुनयना ही आपली प्रेयसी असल्याचे सांगत आईशी संबंध प्रस्थापित करीत असताना निकिता- वरही अत्याचार केल्याची कबुली दिली.
