जळगाव मिरर | २० ऑक्टोबर २०२४
भुसावळ येथील तापी नदीच्या पुलावरुन बांभोरी येथील तरुणाने गुरुवारी रात्री उडी घेतली होती. पोलिसांना या तरुणाचा मृतदेह शोधण्यात १९ रोजी यश आले असून या प्रकरणी भुसावळ शहर पोलिसांत घटनेची नोंद करण्यात आली आहे.
मिळालेल्या माहितीनुसार, जळगाव शहराजवळील बांभोरी येथील अविनाश सोनवणे (वय २४) हे १७ रोजी रात्री १० वाजेच्या सुमारास दुचाकी (एमएच- १९, बीडी- ३०२०) ने महिला व एका तरुणीसह भुसावळकडे आला होता. या वेळी या तरुणाने त्याची दुचाकी तापी नदीच्या पुलावर उभी केली. त्यानंतर रात्री महिला व युवतीसोबत असताना अविनाश सोनवणे यांनी पुलावरून तापी नदीत उडी घेतली. या घटनेनंतर पुलावर मोठी गर्दी जमली होती. तर भुसावळ शहर पोलिसांना ही माहिती मिळताच पोलिस निरीक्षक उद्धव डमाळे व त्यांच्या सहकाऱ्यांनी घटनास्थळी धाव घेतली.
या घटनेची माहिती घेत पोलिसांनी या दोघा महिलांना ताब्यात घेतले. तर दुसऱ्या दिवशी अर्थात १८ रोजी दिवसभर अविनाश सोनवणे यांचा नदी पात्रातील पाण्यात पोलिसांकडून शोध सुरु होता. अखेर दोन दिवसांनंतर अर्थात १९ रोजी त्यांचा मृतदेह हाती लागला. पोलिसांनी त्यांच्या मृतदेहाचे भुसावळ ट्राम केअर सेन्टर मध्ये शवविच्छेदन करून मृतदेह नातेवाईकांच्य ताब्यात दिला. मात्र, अविनाश याने आत्महत्यासारखे टोकाचे पाऊल का उचलले? याबद्दल माहिती मिळाली नाही. य प्रकरणी भुसावळ शहर पोलिस ठाण्यात या घटनेची नोंव करण्यात आली आहे