जळगाव मिरर | २ नोव्हेबर २०२४
भडगाव तालुक्यातील कजगावकडून चाळीसगावकडे जाणारा ट्रक भोरटेक फाट्यावरील वळणावर उलटला. या अपघातात दोन जण जखमी झाले. त्यांना उपचारासाठी चाळीसगावला रवाना करण्यात आले आहे. ही घटना शुक्रवारी दुपारी घडली.
मिळालेल्या माहितीनुसार, कजगावकडून चाळीसगावकडे जाणारा ट्रक भोरटेक फाट्यावरील वळणावर पलटी झाला. यात मोठी प्राणहानी टळली. अमरावती येथून ट्रक क्रमांक (डी.डी.०१ पी. ९३०८) कच्चा दोरा भरून मालेगाव नांदगाव येथे जात असताना भोरटेक फाट्यावरील वळणावर उलटला. ट्रक सरळ इलेक्ट्रिक खांबावर आदळला. सुदैवाने विजेचा खांब जवळच्या निंबाच्या झाडावर टेकला गेल्याने वीज प्रवाहाच्या तारा झाडावरच अडकल्या, अन्यथा मोठी दुर्घटना घडली असती.
पोलिस निरीक्षक पांडुरंग पवार यांच्यासमोर ही घटना घडली. त्यांनी तातडीने कजगाव पोलिस मदत केंद्रावरील सहायक फौजदार छबूलाल नागरे, पोलिस नाईक नरेंद्र विसपुते यांना घटनास्थळी बोलावत ट्रकमध्ये अडकलेले चालक पवन अहिरे व अन्य एक या दोघांना बाहेर काढत रुग्णवाहिकेने चाळीसगांव रुग्णालयात दाखल केले. त्यांच्यावर तातडीने उपचार करण्यात आले. त्यांची प्रकृती स्थिर असल्याचे वैद्यकीय अधिकाऱ्यांनी सांगितले.
भोरटेक फाट्यावरील वळण अत्यंत धोकादायक आहे. दोन गावांतील रहदारीच्या जागी हे वळण आहे. ट्रक पलटी झालेल्या जागी कायम वर्दळ असते. इलेक्ट्रिक खांब झाडावर पडल्याने मोठी दुर्घटना टळली. घटनेची माहिती मिळताच परिसरातील नागरिकांनी घटनास्थळी धाव घेत अपघातग्रस्तांना मदत केली.
