जळगाव मिरर | २४ एप्रिल २०२५
राज्यातील प्रत्येक महामार्गावर अपघाताच्या घटना सातत्याने घडत असतांना आता भरगच्च प्रवासी घेऊन नागपूरकडे जाणारी भरधाव ट्रॅव्हल्स मानोरा फाटा परिसरातील नाल्यात पलटली. सुदैवाने यात जीवीत हानी झाली नाही. मात्र 32 वर प्रवासी जखमी झाले. या सर्वांना भिवापूर व उमरेड येथील शासकीय रूग्णालयात हलविण्यात आले असुन येथे त्यांच्यावर प्राथमिक उपचार सुरू आहे.
मिळालेल्या माहितीनुसार, सदर अपघात बुधवारला (दि. २४) सकाळी 10 वाजताच्या सुमारास राष्ट्रीयमार्गावरील मानोरा फाटा परिसरात झाला. प्राप्त माहितीनुसार एम.एच. 37 बी. 6964 ही चामोर्शीवरून निघालेली श्रीबाबा नामक ट्रॅव्हल्स भिवापूर बसस्थानकावरून प्रवासी घेऊन नागपूरकडे निघाली. दरम्यान राष्ट्रीय मार्गावरील मानोरा फाटा शिवारात चालकाचे नियंत्रण सुटल्याने ही भरधाव ट्रॅव्हल्स थेट 15 फुट खोल नाल्यात कोसळली. सुदैवाने यात जीवीत हानी झाली नाही. दरम्यान याच मार्गाने उमरेडकडे जात असलेले माजी आ. सुधीर पारवे यांना अपघाताचे दृष्य दिसताच, त्यांनी लागलीच जखमींना मदतीचा हात देत, ठाणेदार जयप्रकाश निर्मल यांना कळविले.
