जळगाव मिरर | १६ मे २०२५
राज्यातील विधानसभा निवडणुकीपूर्वी महायुतीने लाडकी बहिण योजना जाहीर केली होती हि योजना महायुतीला गेमचेंजर ठरली असून आता राज्याचे उपमुख्यमंत्री अजित पवार यांनी पात्र लाडक्या बहिणींना ४० हजार रुपयांपर्यंत कर्ज देण्याबाबत नांदेड येथील कार्यक्रमात सूतोवाच केले होते. मात्र, महिला आणि बालविकास विभागाकडून मुख्यमंत्री माझी लाडकी बहीण योजनेच्या लाभार्थी महिलांना कर्ज देण्यासाठी कोणतीही योजना तयार नसल्याचे सांगत तूर्तास कानावर हात ठेवले आहेत. वित्त किंवा सहकार विभागाकडून यासंदर्भात काही योजना तयार असल्यास ती लवकरच मंत्रिमंडळाच्या बैठकीत समोर येईल, असेही महिला व बाल कल्याण अधिकाऱ्यांनी म्हंटले आहे.
सर्व लाभार्थी महिलांना नियमितपणे १५०० रुपये मिळावेत ही त्यांची प्राथमिकता आहे. राज्याची आर्थिक स्थिती सुधारल्यावर हा हप्ता २१०० रुपयांपर्यंत वाढविण्याचा सरकारचा विचार आहे. अशा परिस्थितीत नवीन योजना सुरू करण्याचा आमचा विचार नाही. लाडकी बहीण योजनेवर महायुती सरकार सुमारे ४५ हजार कोटी रुपये खर्च करत आहे, अशी माहितीही या अधिकाऱ्याने दिली.
उपमुख्यमंत्री अजित पवार म्हणाले, राज्यातील लाडक्या बहिणींना दरमहा दीड हजार रुपये शासनाच्यावतीने दिले जातात. या पोटी ४५ हजार कोटी रुपये खर्च होतात. एखाद्या महिन्यात थोडासा विलंब झाला तरी विरोधक अफवा पसरवतात. बहिणींनी या अफवांवर विश्वास ठेवू नये. खऱ्या लाभार्थ्यांना या योजनेचा लाभ मिळत राहणार आणि योजना बंद होणार नाही, असं अजित पवार म्हणाले होते.
पुढे बोलताना म्हणाले, दरमहा दीड हजार रुपये द्यायचेच आहेत. परंतु त्याबरोबरच जर काही बहिणींना लघु उद्योग सुरु करायची इच्छा असेल परंतु त्यांच्याकडे भांडवल नसेल आणि बँकाचे कर्ज घेण्यासाठी हमीची आवश्यकता असेल तर लाडकी बहीण योजनेच्या दीड हजार रुपये महिना या रकमेची हमी देऊन ४० हजार रुपयांपर्यंतचे कर्ज उपलब्ध करुन देण्याच्या दृष्टीने शासनाचे प्रयत्न सुरु असल्याचे अजित पवारांनी सांगितले होते.
