जळगाव मिरर | १ जून २०२५
जळगाव – धुळे महामार्गावरील शिवकॉलनी स्टॉपजवळ पायी रस्ता ओलांडत असताना एका भरधाव कंटेनरने महसूल विभागाच्या कर्मचाऱ्याला जबर धडक देवून चिरडल्याची धक्कादायक घटना आज १ जून रोजी दुपारी अडीच ते तीन वाजण्याच्या सुमारास घडली आहे. या भीषण अपघातात विशाल रमेश सोनार (वय ४४) असे मयत झालेल्या कर्मचाऱ्याचे नाव असून अपघातानंतर कंटेनर चालक वाहन घेऊन तात्काळ पसार झाला.
मिळालेल्या माहितीनुसार, पाळधीकडून जळगाव शहराकडे जाणाऱ्या रोडवर शिवकॉलनीजवळ रस्ता ओलांडत विशाल सोनार यांना भरधाव वेगात आलेल्या कंटेनरने जबर धडक दिली आणि त्यांना चिरडले. हा अपघात दुपारी अडीच वाजता घडल्यानंतर, कंटेनर चालक न थांबता घटनास्थळावरून पसार झाला. मयत विशाल सोनार यांच्या खिशात त्यांचे ओळखपत्र आढळून आले. त्यावरून ते महसूल विभागात शिपाई म्हणून कार्यरत असल्याचे समोर आले. या माहितीने परिसरात हळहळ व्यक्त होत आहे. पोलिसांनी तात्काळ मृतदेहाचा पंचनामा केला आणि एका खाजगी वाहनातून मृतदेह जिल्हा शासकीय वैद्यकीय महाविद्यालय व रुग्णालयात दाखल करण्यात आला.
दरम्यान, या घटनेची माहिती मिळाल्यानंतर मयत विशाल सोनार यांच्या नातेवाईकांनी देखील रुग्णालयात धाव घेतली असून, त्यांच्यावर दुःखाचा डोंगर कोसळला आहे. या प्रकरणी पोलीस ठाण्यात अज्ञात वाहनचालकावर गुन्हा दाखल करण्याचे काम सुरू होते. सीसीटीव्हीच्या माध्यमातून पोलीसांकडूनफरार कंटेनरचालकाचा शोध घेण्यासाठी पुढील तपास सुरू करण्यात आला आहे. याबाबत पोलीस ठाण्यात गुन्हा दाखल करण्याचे काम सुरू होते.
