जळगाव मिरर | ८ ऑगस्ट २०२५
9 ऑगस्ट हा जागतिक आदिवासी गौरव दिवस आदिवासी बांधवांचा सन्मानाचा, अभिमानाचा दिवस म्हणून जगभर मोठ्या उत्साहात साजरा केला जातो. या जागतिक आदिवासी दिनानिमित्त तडवी समाजामार्फत यावल शहरात विविध कार्यक्रमांचे आयोजन करण्यात येत असते यात. भव्य मिरवणूक, आरोग्य शिबिरे, सांस्कृतिक कार्यक्रम आणि सजीव देखाव्यांचा समावेश असतो.
जागतिक आदिवासी दिवस हा तडवी समाजासाठी अस्मितेचा दिवस म्हणून ओळखला जातो. म्हणून दरवर्षी हा कार्यक्रम मोठ्या उत्सवात राबविण्यासाठी डोंगरदऱ्यातील आदिवासी बांधव एकत्रयेत तडवी समाजाची राजधानी म्हणून ओळख असलेल्या यावल शहरात हा कार्यक्रम मोठ्या उत्सवात साजरा करीत असतात. दरवर्षी प्रमाणे या वर्षीही हा कार्यक्रम मोठ्या उत्सवात साजरा व्हावा. यासाठी आदिवासी तडवी भिल्ल उत्सव समिती पदाधीकारी, सदस्य, समाजातील विविध सामाजिक संघटना तसेच सर्व समाज बांधव महिनाभरापासून नियोजन बद्ध कार्य करीत आहेत.
सुरुवातीला आदिवासी दैवत, क्रांतिकारक आणि तडवी समाजातील समाज सुधारक यांच्या प्रतिमेला वंदन करुन यावल शहरातील तडवी कॉलनी ते धनश्री टॉकीज पर्यंत भव्य मिरवणूक काढण्यात येणार आहे. या भव्य मिरवणूकीत तडवी बांधव पारंपरिक वेशभूषेत, डोक्यावर फेटे, हत्यारे, आखाडा, ढोल ताशे, पारंपरिक मांडोव देखावा , पारंपरिक घरांचा साकारलेला सजीव देखावा, क्रांतिकारकांचे प्रतिकात्मक पुतळे अशी विविध देखणी देखावे असणार आहेत सोबतच या भव्य मिरवणुकीत साजोणी नृत्यासहित तडवी बांधवानचे आपल्या आदिम आदिवासी संस्कृतीचे लक्षवेधी प्रदर्शनही या रॅलीच्या मध्यामतून केले जाणार आहे. जेणेकरून तडवी भील संस्कृतीचे दर्शन सर्वांना अनुभवता येईल.
या कार्यक्रमात राजकीय, सामाजिक नेत, शासकीय अधीकारी कर्मचारी, व्यवसायिक, कामगार मजूर, शाळेचे विद्यार्थी, युवक युवती यांचाही या कार्यक्रमात मोठया प्रमाणात सहभाग असणार आहे.
सांस्कृतिक कार्यक्रमाची सुरुवात बालगोपालांच्या स्वागतगीत सादरीकरणाने होईल. तसेच या कार्यक्रमात बालकलाकारांची पारंपरिक आदिवासी नृत्य, तडविभिल्ल आदिवासी विवाह संस्कृतीचा ओळख असणारी गोय सोयनी. चिमुकल्यांची वीररसपूर्ण तडवी बोलीभाषेतील भाषणे. तसेच तडवी भाषेतील कविता व रॅप साँग आणि मान्यवरांची भाषणे देखील या कार्यक्रमादरम्यान सादर करण्यात येणार आहेत.
या भव्य कार्यक्रम परिसरात रक्तदान ही सर्वश्रेष्ठ दान या जाणिवेतून समाज बांधवांनी रक्तदान शिबिराचे आयोजन ही या निमित्ताने केले आहे. त्यात दरवर्षी आदिवासी बांधवांचा रक्तदानाला भरपूर प्रमाणात प्रतिसादही मिळतो. तसेच यावर्षी ९ ऑगस्ट जागतिक आदिवासी दिनानिमित्त तडवी फैजपूरीयन्स, फैजपूर आणि कांताई नेत्रालय आय केअर फाॅर यू सेंटर, जळगाव यांच्या संयुक्त विद्यमाने मोतीबिंदू नेत्र तपासणी शस्त्रक्रिया शिबिराचे आयोजन करण्यात आले असून हे शिबीर धनश्री टॉकिज येथे सकाळी 9 ते 4 वाजे दरम्यान होईल. त्यासाठी रुग्णांनी सोबत आधारकार्ड व रेशनकार्ड असणे आवश्यक आहे. असे आवाहनही तडवी फैजपूरीयन्स ग्रुप मार्फत करण्यात आले आहे
