जळगाव मिरर | १ सप्टेंबर २०२५
गेल्या काही महिन्यापासून जळगाव जिल्ह्यात खुनाच्या घटनेचे प्रमाण दिवसेदिवस वाढत असतांना आता अमळनेर शहरातून एक काळजाला थरकाप उडवणाऱ्या घटनेत जन्मदात्या वडिलांचाच मुलाने लोखंडी हातोड्याने ठार केले. ही घटना अमळनेर शहरातील शिरूड नाका परिसरात 31 ऑगस्ट रोजी रात्री उशिरा घडली. या अमानुष घटनेने संपूर्ण परिसर हादरला असून कुटुंबीय, शेजारी व नागरिकांमध्ये हळहळ व्यक्त केली जात आहे. मृत व्यक्तीचे नाव राजेंद्र दत्तात्रय कासार (वय 64, रा. शिरूड नाका, अमळनेर) असे असून, आरोपी मुलाचे नाव भूषण राजेंद्र कासार आहे.
सविस्तर वृत्त असे कि, रात्रीच्या सुमारास घरामध्ये वडील आणि मुलामध्ये कोणत्या तरी क्षुल्लक कारणावरून वाद झाला. वाद इतका टोकाला गेला की, संतापलेल्या भूषणने घरात पडलेली लोखंडी हातोडी घेऊन थेट वडिलांच्या डोक्यात जोरात वार केला. रक्ताच्या थारोळ्यात पडलेले राजेंद्र कासार यांना तातडीने ग्रामीण रुग्णालयात दाखल करण्यात आले, मात्र डॉक्टरांनी त्यांना मृत घोषित केले. घटनेची माहिती मिळताच पोलीस निरीक्षक दत्तात्रय निकम, सहाय्यक पोलीस निरीक्षक रवींद्र पिंगळे, सपोनि सुनील लोखंडे व पोउपनि शरद काकळी यांच्या नेतृत्वाखाली पोलीस पथक घटनास्थळी दाखल झाले. फॉरेन्सिक पथकाने तपास करत खुनासाठी वापरलेली लोखंडी हातोडी जप्त केली.
प्राथमिक तपासात हे स्पष्ट झाले आहे की, मुलगा भूषण यानेच आपल्या वडिलांचा खून केला असून, त्याच्या विरोधात खुनाचा गुन्हा दाखल करून त्याला अटक करण्यात आली आहे. मात्र, या खुनामागील नेमकं कारण अद्याप अस्पष्ट आहे आणि पोलीस तपास सुरु आहे.
