जळगाव मिरर | २ सप्टेंबर २०२५
यावल तालुक्यातील वनोली शिवारात वन अधिकारी, कर्मचाऱ्यांच्या पथकाने केलेल्या कारवाईत दोघांना ताब्यात घेवून त्यांच्याकडून ५ मृत मोर व १ बंदूक, चाकूसह इतर साहित्य जप्त करण्यात आले. या दोघांना न्यायालयाने ३ दिवसांची वन कोठडी सुनावली आहे.
सविस्तर वृत्त असे कि, फैजपूर येथील वनपाल यांना ३१ ऑगस्टला ९.३० वाजेच्या सुमारास मिळालेल्या गुप्त माहितीवरून फैजपुर रॉऊन्ड स्टाफ व वन कर्मचाऱ्यांसह यावल तालुक्यातील वनोली शिवारात जाऊन दबा धरुन बसले होते. या वेळी त्यांना बंदुकीच्या फायरिंगचा आवाज आला. हा आवाज येताच ते सर्व आवाजाच्या दिशेने पळत गेले. परिसरात शोध घेतला असता दोन व्यक्ती संदिग्ध अवस्थेत दिसून आले. पथकाने साफळा रचून जागीच त्यांना रंगेहाथ पकडले. या वेळी एका संशयित आरोपीजवळ १ बंदूक, २ चाकू, टॉर्च व १ दुचाकी असे शिकारीसाठी लागणारे साहित्य तसेच एका पोत्यात ५ मृत मोर पथकाला आढळले. ५ मृत मोर व शिकारीच्या साहित्यासह मारुळ येथील सलीम रुबाब तडवी व सय्यद अफसर अली मुश्ताक अली या दोघांना ताब्यात घेवून त्यांना चौकशीसाठी यावल येथे आणले आहे. या प्रकरणी बोरखेडा बुद्रुक येथील वनरक्षक यांनी वन्यजीव संरक्षण अधिनियमाच्या विविध कलमान्वये गुन्हा नोंदवला आहे. दरम्यान, आज दुपारी आरोपींना यावल येथील न्यायाधिशांसमोर हजर केले असता त्यांनी दोन्ही संशयित आरोपींना ३ दिवसांची वन कोठडी सुनावली आहे.
ही कारवाई वनसंरक्षक निनू सोमराज, उपवनसंरक्षक जमीर शेख, विभागीय वन अधिकारी राजेंद्र सदगीर, सहाय्यक वनसंरक्षक समाधान पाटील तसेच वन परिक्षेत्र अधिकारी स्वप्नील फटांगरे यांच्या मार्गदर्शनाखाली करण्यात आली. कारवाईदरम्यान फैजपूरचे वनपाल व रेंज स्टॉफ हजर होते. तर वनपरिक्षेत्र अधिकारी यांच्यात मार्गदर्शनात तपास सुरु आहे.
