जळगाव मिरर । २३ सप्टेंबर २०२५
भारत विरुद्ध पाकीस्तान क्रिकेट मॅचरव ऑनलाईन बेटींग (सट्टा) खेळविणाऱ्यांवर स्थानिक गुन्हे शाखेच्या पथकाने छापा टाकत कारवाई केली. याठिकाणाहून संशयित प्रकाश हुदामल कारडा (वय ५५, रा. सिंधी कॉलनी, भुसावळ) व रणजीत चत्रभान हंडी (वय ३५, रा. गणपतीनगर) या दोघांना ताब्यात घेतले. त्यांच्याकडून १ लाख ५ हजारांचे बेटींगचे साहित्य जप्त केले आहे.
सविस्तर वृत्त असे कि, भुसावळातील बाजारपेठ पोलीस ठाण्याच्या हद्दीतील सिंधी कॉलनी परिसरात प्रकाश कारडा हा त्याच्या राहत्या घरी भारत विरुद्ध पाकीस्तानच्या क्रिकेट मॅचवर ऑनलाईन बेटींग (सट्टा) खेळवित असल्याची माहिती पोलीस निरीक्षक राहुल गायकवाड यांना मिळाली. त्यांनी लागलीच पथकातील उपनिरीक्षक शरद बागल, रवी रनवाडे, उमाकांत पाटील, विकास सातदिवे, राहुल वानखेडे, प्रशांत परदेशी, मपोकॉ दर्शना पाटील, भरत पाटील यांचे पथक रवाना केले. या पथकाने बेटींग करणाऱ्या कारडाच्या घरावर छापा टाकला असता, त्याठिकाणी प्रकाश कारडा व रणजीत हंडी हे दोघे बेटींग करतांना मिळून आले. त्यांच्याकडून १ लाख ५ हजारांचे साहित्य जप्त करण्यात आले असून त्याच्याविरुद्ध बाजारपेठ पोलीस ठाण्यात गुन्हा दाखल करण्यात आला आहे
