जळगाव मिरर | २ फेब्रुवारी २०२६
जळगाव महापालिकेच्या महापौर व उपमहापौर पदासाठी नामनिर्देशन पत्र भरण्याची आज अंतिम मुदत असून, त्या पार्श्वभूमीवर सत्ताधारी भाजप व शिंदेसेना यांच्यातील हालचालींना वेग आला आहे. रविवारी दुपारी शिंदेसेनेचे मंत्री गुलाबराव पाटील, आमदार चंद्रकांत सोनवणे, जिल्हाप्रमुख विष्णु भंगाळे तसेच भाजपकडून आमदार मंगेश चव्हाण, आमदार राजुमामा भोळे व महानगर अध्यक्ष दीपक सूर्यवंशी यांची संयुक्त बैठक पार पडली.
या बैठकीत महापौर व उपमहापौर पदासाठी प्रत्येकी तीन नावांवर सविस्तर चर्चा करण्यात आली. चर्चेनुसार महापौर पदासाठी भाजपचा एक सदस्य तर उपमहापौर पदासाठी शिंदेसेनेचा एक सदस्य आज नामनिर्देशन अर्ज भरणार असल्याचे निश्चित झाले आहे. महापौर पदासाठी दिपमाला काळे यांचे नाव आघाडीवर असून, उपमहापौर पदासाठी मनोज चौधरी यांचे नाव पुढे असल्याची चर्चा आहे.
महापौर पदासाठी दिपमाला काळे, उज्वला बेंडाळे व वैशाली पाटील ही नावे चर्चेत असून, रविवारी झालेल्या बैठकीतही यावर विचारमंथन झाले. मात्र, अंतिम नावावर एकमत झालेले नाही. त्यामुळे आज दि.३ रोजी भाजप व शिवसेनेच्या सर्व नगरसेवकांची जी.एम. फाउंडेशन येथे संयुक्त बैठक आयोजित करण्यात आली आहे. या बैठकीत चर्चा करून महापौर व उपमहापौर पदासाठी उमेदवारांचे नामनिर्देशन दाखल करण्यात येणार आहे.
दोन्ही पक्षांनी समन्वयाने महापौर व उपमहापौर पदांची विभागणी करण्याचे ठरविले असून, १०–१० महिने किंवा प्रत्येकी एक वर्ष असा कार्यकाळाचा फॉर्म्युला ठरविण्याबाबतही नगरसेवकांच्या बैठकीत चर्चा होणार आहे. यासोबतच स्वीकृत सदस्य व स्थायी समिती सदस्यांच्या नियुक्तीबाबतही निर्णय होण्याची शक्यता आहे. दोन्ही पक्षांकडून एक-एकच अर्ज भरण्यात येणार असल्याचे पदाधिकाऱ्यांनी स्पष्ट केल्यामुळे आजच महापौर व उपमहापौर पदाचे चित्र स्पष्ट होण्याची शक्यता आहे. मात्र, औपचारिक घोषणा दि.६ रोजी होणाऱ्या विशेष महासभेत निवडीनंतर करण्यात येणार आहे.
