जळगाव मिरर | ७ फेब्रुवारी २०२६
जळगाव महानगरपालिकेत महापौर व उपमहापौर निवडीसाठी आयोजित विशेष सभेत सर्व नगरसेवकांची उपस्थिती होती. सत्ताकारण, चर्चा आणि निर्णयांच्या वातावरणात अचानक एक असा क्षण घडला, ज्यामुळे संपूर्ण सभागृह भारावून गेले. नगरसेविका भारती सागर सोनवणे या आपल्या तान्हुल्यासह सभागृहात दाखल होताच सर्वांचे लक्ष त्यांच्याकडे वेधले गेले.
तान्हुल्याला कुशीत घेत भारती सोनवणे आपल्या आसनावर बसल्या. सभागृहातील राजकीय गडबडीत त्या क्षणी मातृत्वाची शांत, हळवी छाया पसरली. बाळाच्या किलबिलीने आणि निरागस हसण्याने सभागृहातील वातावरण क्षणभर बदलून गेले. अनेक नगरसेवकांनी बाळाचे कौतुक केले, तर काहींनी प्रेमाने त्याचा मुका घेत लोकशाहीच्या व्यासपीठावर माणुसकीचा स्पर्श अनुभवला.
महापौर व उपमहापौर निवडीसाठीची ही विशेष सभा निर्णयांच्या दृष्टीने महत्त्वाची असली, तरी या सभेत घडलेला हा छोटासा पण भावनिक क्षण उपस्थितांच्या मनात घर करून गेला. राजकारणाच्या औपचारिकतेपलीकडे जाऊन मातृत्व, आपुलकी आणि संवेदनशीलतेचे दर्शन या क्षणी घडले. या अनोख्या प्रसंगामुळे जळगाव मनपाच्या सभागृहात लोकशाही केवळ नियमांपुरती मर्यादित नसून, ती माणुसकीच्या भावनांनीही समृद्ध असते, याचा प्रत्यय सर्वांना आला.
