जळगाव मिरर | ९ ऑक्टोबर २०२६
रावेर तालुक्यातील एका गावातील २४ वर्षीय तरुणीला तिच्या इच्छेविरुद्ध चारचाकी वाहनातून बळजबरीने घेऊन गेल्याचा धक्कादायक प्रकार गुरुवारी दि. ८ रोजी पहाटे पिंपरुड-सावदा रस्त्यावर घडल्याचा आरोप आहे. यावेळी तरुणीच्या आई-वडिलांना मारहाण करण्यात आल्याची तक्रारही सावदा पोलिसांत दाखल करण्यात आली आहे. या प्रकरणी टेकचंद रविंद्र सरोदे (रा. रोझोदा, ता. रावेर) याच्यासह तीन अनोळखी व्यक्तींविरुद्ध गुन्हा दाखल केला आहे.
पोलिसांत दाखल तक्रारीनुसार, संबंधित तरुणीचे यापूर्वी टेकचंद सरोदे याच्यासोबत लग्न झाले होते. मात्र, त्यानंतर ती आपल्या आई-वडिलांसोबत राहत होती. या प्रकरणासंदर्भात न्यायालयीन वाद सुरू असून, गुरुवारी उच्च न्यायालयात सुनावणी होती. त्यासाठी तरुणी तिच्या आई-वडिलांसोबत मोटारसायकलवरून भुसावळकडे जात होती. पहाटे सुमारे ५.१५ वाजता पिंपरुड-सावदा रस्त्यावर स्मशानभूमीपासून काही अंतरावर वळणाजवळ त्यांच्या मोटारसायकलला मागून ग्रे रंगाच्या चारचाकी वाहनाने धडक दिल्याचा आरोप तक्रारीत करण्यात आला आहे. धडकेनंतर वाहनातून तीन जण खाली उतरले. त्यापैकी दोघांनी चेहऱ्यावर काळे मास्क लावले होते, तर टेकचंद सरोदे याचा चेहरा उघडा असल्याचे फिर्यादीने नमूद केले आहे. यानंतर तिघांनी स्प्रेच्या सहाय्याने तरुणी आणि तिच्या आई-वडिलांच्या चेहऱ्यावर फवारणी केल्याने त्यांना जळजळ होऊ लागल्याचे तक्रारीत म्हटले आहे. त्यानंतर तरुणीला जबरदस्तीने कारमध्ये बसविण्याचा प्रयत्न केला. तिने विरोध केल्यावर तिला मारहाण करण्यात आल्याचा आरोप आहे.
मुलीला वाचविण्यासाठी तिच्या आईने हस्तक्षेप केला असता तिच्याशीही चापट बुक्क्यांनी मारहाण करण्यात आल्याचे तक्रारीत नमूद आहे. या झटापटीदरम्यान त्यांच्या गळ्यातील सोन्याचे मंगळसूत्र तुटून पडल्याचेही फिर्यादीने सांगितले आहे. दरम्यान, दोन अनोळखी व्यक्तींनी फिर्यादीला पकडून ठेवत मारहाण केली, तर टेकचंद सरोदे याने तरुणीला बळजबरीने वाहनात बसविल्याचा आरोप करण्यात आला आहे. त्यानंतर तिघेही कारमध्ये बसून पिंपरुडच्या दिशेने भरधाव निघून गेल्याचे तक्रारीत म्हटले आहे. घटनेनंतर फिर्यादी आणि त्यांची पत्नी सावदा पोलीस ठाण्यात दाखल झाले. दोघांना वैद्यकीय तपासणीसाठी पाठविण्यात आले. या प्रकरणी सावदा पोलिसांनी गुन्हा दाखल केला असून, पोलीस निरीक्षक गणेश पांडुरंग फड यांच्या मार्गदर्शनाखाली पुढील तपास सुरू आहे. पोलिसांकडून बेपत्ता तरुणीचा शोध घेण्यात येत असून, घटनेत वापरण्यात आलेले चारचाकी वाहन तसेच अन्य संशयितांचा शोध घेतला जात आहे. तक्रारदाराने वाहन आणि चेहरा झाकलेल्या संशयितांना समोर आणल्यास त्यांची ओळख पटवू शकत असल्याचे पोलिसांना सांगितले आहे.
