जळगाव मिरर | १३ फेब्रुवारी २०२६
ऑनलाइन कर्ज अॅपवरून घेतलेले अल्प रकमेचे कर्ज शासकीय कार्यालयातील एका कर्मचाऱ्यास चांगलेच महागात पडले आहे. कर्जाची पूर्ण परतफेड करूनही पुन्हा हप्ता भरण्याची मागणी करत बदनामीची धमकी देण्यात आली. एवढ्यावरच न थांबता संबंधित अॅपच्या हॅकरने त्या कर्मचाऱ्याचे अश्लील फोटो तयार करून सोशल मीडियावर प्रसारित केल्याचा धक्कादायक प्रकार समोर आला आहे.
मिळालेल्या माहितीनुसार, मनोज सदाशिव तायडे (वय ४०) हे तहसील कार्यालयात कार्यरत आहेत. आर्थिक अडचणीमुळे त्यांनी गत आठवड्यात एका ऑनलाइन कर्ज अॅपवरून सुमारे साडेतीन हजार रुपयांचे कर्ज घेतले होते. कर्ज प्रक्रियेदरम्यान त्यांनी आधार कार्ड, पॅन कार्ड, फोटो, ई-मेल आणि संपर्क क्रमांक अशी वैयक्तिक माहिती संबंधित अॅपवर अपलोड केली होती.
सदर कर्ज त्यांनी अवघ्या आठ दिवसांत पूर्णपणे फेडले. मात्र, कर्जाची परतफेड करूनही अॅपकडून कर्ज न भरल्याचा दावा करत तत्काळ हप्ता भरण्याची मागणी करण्यात आली. अन्यथा बदनामी करण्याची धमकी देण्यात आली. तायडे यांनी कर्ज भरल्याचे पुरावे संबंधितांकडे पाठवले; तरीदेखील त्रास सुरूच राहिला. अखेरीस ‘तुम्हाला जे करायचे ते करा,’ असे सांगून त्यांनी फोन कट केला.
यानंतर काही वेळातच संबंधित हॅकरने त्यांचे अश्लील फोटो तयार करून त्यांच्या मित्र-मैत्रिणी तसेच कार्यालयातील कर्मचाऱ्यांना सोशल मीडियाद्वारे पाठवले. हा प्रकार लक्षात येताच तायडे घाबरले आणि त्यांनी तत्काळ बोदवड पोलिस ठाण्यात धाव घेत तक्रार दाखल केली.
या प्रकरणी पोलिसांनी अज्ञात व्यक्तीविरुद्ध गुन्हा नोंद केला असून पुढील तपास सुरू आहे. दरम्यान, ऑनलाइन कर्ज अॅपच्या वाढत्या फसवणूक प्रकारांमुळे नागरिकांनी वैयक्तिक माहिती देताना अत्यंत सतर्क राहावे, तसेच संशयास्पद अॅप्सपासून दूर राहावे, असे आवाहन पोलिस प्रशासनाकडून करण्यात येत आहे.
