जळगाव मिरर | २५ मार्च २०२६
भोंदू बाबा अशोक खरात प्रकरणावरून राज्यातील राजकारण ढवळून निघाले असताना मुख्यमंत्री देवेंद्र फडणवीस यांनी विधानसभेत महत्त्वपूर्ण निवेदन करत तपासाबाबत सरकारची भूमिका स्पष्ट केली. “कोणाचाही फोटो किंवा संबंध यावरून गुन्हा सिद्ध होत नाही. मात्र, डिजिटल पुराव्यांच्या आधारे तपास सुरू असून ज्यांच्याविरुद्ध ठोस पुरावे मिळतील त्यांच्यावर कठोर कारवाई केली जाईल,” अशी ग्वाही त्यांनी दिली.
मुख्यमंत्र्यांनी स्पष्ट इशारा देत सांगितले की, “या प्रकरणात कोणीही पोलिसांवर दबाव आणण्याचा किंवा हस्तक्षेप करण्याचा प्रयत्न केला, तर त्यांनाही पाठीशी घातले जाणार नाही.” त्यांनी विरोधकांच्या निवृत्त न्यायाधीशांच्या देखरेखीखाली तपास करण्याच्या मागणीला नकार दिला.
विधानसभेत विरोधकांनी अनेक राजकारणी, आयपीएस, आयएएस अधिकारी आणि वरिष्ठ अधिकाऱ्यांचे अशोक खरातसोबतचे फोटो समोर आल्यामुळे तपासात हस्तक्षेप होण्याची भीती व्यक्त केली होती. यावर उत्तर देताना फडणवीस म्हणाले की, “राजकारणात अनेक लोकांशी संपर्क येतो. केवळ फोटोवरून कोणी आरोपी ठरत नाही.”
तपासाबाबत माहिती देताना त्यांनी सांगितले की, खरातच्या मोबाईलची फॉरेन्सिक तपासणी सुरू असून मुंबईतील प्रयोगशाळेत डिलीट केलेला डेटा पुन्हा मिळवण्याचे काम सुरू आहे. “त्याच्या मोबाईलमधून कोणाशी संपर्क झाला, कोणते संदेश पाठवले गेले याचा सविस्तर तपास केला जात आहे,” असे त्यांनी स्पष्ट केले.
दरम्यान, या प्रकरणात काही धक्कादायक बाबीही समोर आल्या आहेत. तपासादरम्यान पोलिसांना काही व्हिडिओ हाती लागले असून त्यात आठ महिलांचे शोषण झाल्याचे दिसून येत असल्याची माहिती मुख्यमंत्र्यांनी दिली. या व्हिडिओंमध्ये अशोक खरातने भोंदुगिरी आणि जादूटोण्याच्या नावाखाली महिलांचे लैंगिक शोषण केल्याचे स्पष्ट होत असल्याचे त्यांनी सांगितले.
तपासात सहकार्य करण्यासाठी सुरुवातीला साक्षीदार पुढे येण्यास घाबरत होते. मात्र पोलिसांनी सुरक्षा हमी दिल्यानंतर काही महत्त्वाचे व्हिडिओ ताब्यात मिळाले, असेही फडणवीस यांनी नमूद केले.
या प्रकरणातील आरोपी राजेंद्र जासूद याला अटकपूर्व जामीन मिळाला असला तरी इतर आरोपींविरुद्ध तपास सुरू आहे. तसेच शिर्डी येथे एका महिलेने दिलेल्या तक्रारीनुसार नीरज जाधव याने एआय-जनरेटेड फोटो व्हायरल करण्याची धमकी दिल्याचा आरोपही समोर आला आहे. संबंधित फोटो नंतर डिलीट करण्यात आला असला तरी त्याविरोधात गुन्हा दाखल करण्यात आला आहे.
एकूणच, भोंदू बाबा अशोक खरात प्रकरणातील तपास आता निर्णायक टप्प्यात पोहोचत असून, यामध्ये मोठ्या राजकीय आणि प्रशासकीय नावांचा उलगडा होण्याची शक्यता व्यक्त केली जात आहे. मुख्यमंत्री फडणवीस यांच्या भूमिकेमुळे या प्रकरणातील कारवाईकडे राज्याचे लक्ष लागले आहे.
