चंद्रपूर : वृत्तसंस्था
पालक आपल्या मुलांचा वाढदिवस खूप मोठ्या उत्साहात करीत असतात त्यामध्ये वाढदिवसामध्ये बलून पासून केक पर्यंत सर्वच आणत असतो. पण त्यामध्ये आपण स्पार्कल मेणबत्ती सुद्धा आणत असतोच परंतु तो सुद्धा आपल्यासाठी खूप घातक ठरू लागलेला आहे. या स्पार्कल मेणबत्तीमुळे एका १० वर्षीय मुलाचा गाल व जीभ फाटल्याची धक्कादायक माहिती समोर आली आहे.
मिळालेली माहिती अशी की, चंद्रपुरात जिल्ह्यातील चिमूर तालुक्यातल्या भिसी गावात हा धक्कादायक प्रकार घडला. आरंभ डोंगरे हा दहा वर्षाचा मुलगा एका मित्राच्या घरी वाढदिवसाला गेला होता. केक कापताना मेणबत्ती पेटवून झाल्यानंतर चार तासांनंतर आरंभ स्पार्कल मेणबत्ती हाताळत होता. त्याचवेळी या मेणबत्तीचा स्फोट झाला. हा स्फोट एवढा भयानक होता की त्यामध्ये आरंभची गाल आणि जीभ फाटली.
तब्बल 5 तासांची शस्त्रक्रिया केल्यानंतर आरंभचा गाल आणि जीभ जोडण्यात आली. पण त्यासाठी तब्बल दीडशे टाके पडले.
भिसी या छोट्या गावात राहणारे विनोद , वैशाली आणि दहा वर्षीय आरंभ हे त्रिकोणी डोंगरे कुटुंब. तिघेही गावातच आपल्या मित्राकडे असलेल्या एका वाढदिवसानिमित्त गेले होते. मुलं आसपास खेळत असताना आरंभ डोंगरे हा दहा वर्षाचा मुलगा स्पार्कल मेणबत्तीशी खेळत होता. तितक्यात मेणबत्तीचा मोठा स्फोट झाला. आरंभला रक्तबंबाळ अवस्थेत 50 किलोमीटर दूरवरच्या ब्रह्मपुरी या तालुक्याच्या ठिकाणी असलेल्या आस्था रुग्णालयात दाखल करण्यात आलं.
रक्तस्त्राव अधिक झाला असल्याने आणि वय कमी असल्याने डॉक्टरांसमोर मोठं आव्हान होतं. मात्र प्लास्टिक सर्जन असलेले डॉ. श्रीकांत पेरका, डॉ. सुमित जयस्वाल आणि डॉ. पंकज लडके यांच्या अथक परिश्रमाने 5 तास शस्त्रक्रिया करण्यात आल्या. आरंभला दीडशे टाके लावल्यानंतर गाल आणि जीभेवर यशस्वी शस्त्रक्रिया करण्यात आली. त्यामुळे मुलांनो आणि पालकांनो, स्पार्कल मेणबत्ती आणणार असाल तर सावध राहा.
