जळगाव मिरर | ९ एप्रिल २०२६
सरकारी योजनेच्या नावाखाली महिलांचा गैरफायदा घेण्याचा संतापजनक प्रकार शहरात उघडकीस आला आहे. लाडकी बहीण योजनेचे केवायसी करून देण्याच्या बहाण्याने एका संशयिताने महिलेवर शरीरसुखाची मागणी करत छळ केल्याची घटना समोर आली असून, त्याच व्यक्तीने दुसऱ्या महिलेकडे प्रेमसंबंधाची मागणी केल्याचाही धक्कादायक खुलासा झाला आहे. या प्रकरणी पीडित महिलेच्या पतीचा मित्र गोकूळ चव्हाण याच्याविरुद्ध शहर पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, शहरातील एका परिसरात राहणाऱ्या ३५ वर्षीय महिलेला लाडकी बहीण योजनेचे केवायसी करायचे होते. त्यासाठी २५ जानेवारी रोजी तिच्या पतीचा मित्र चव्हाण नामक हा तिच्या घरी आला. त्याने संबंधित महिलेची कागदपत्रे घेतली. मात्र, त्यानंतर त्याने महिलेकडे शरीरसुखाची मागणी करून अश्लील प्रस्ताव ठेवला.
हा प्रकार महिलेने पतीला सांगितल्यानंतर त्यांच्या कुटुंबात वाद निर्माण झाला. तरीदेखील आरोपीने आपली वर्तणूक न बदलता वारंवार महिलेच्या घरासमोर येऊन उभे राहणे, तिच्याकडे टक लावून पाहणे असे प्रकार सुरूच ठेवले. ८ एप्रिल रोजीदेखील त्याने असाच त्रास दिल्याने अखेर महिलेने शहर पोलिस ठाण्यात धाव घेत फिर्याद दाखल केली.
तसेच, याच आरोपीने परिसरातील अन्य एका महिलेला ‘बंद झालेले विधवा निवृत्ती वेतन पुन्हा सुरू करून देतो’ असे आमिष दाखवत तिच्याकडे प्रेमसंबंध ठेवण्याची मागणी केल्याचेही तक्रारीत नमूद करण्यात आले आहे. या प्रकरणामुळे परिसरात संताप व्यक्त केला जात असून, महिलांच्या सुरक्षिततेचा प्रश्न पुन्हा ऐरणीवर आला आहे. पोलिसांनी आरोपीविरुद्ध गुन्हा नोंदवून पुढील तपास पोलीस हवालदार प्रकाश वाघ यांच्या मार्गदर्शनाखाली सुरू केला आहे.
