जळगाव मिरर | १२ एप्रिल २०२६
मध्यप्रदेश, गुजरात, दिल्ली अशा वेगवेगळ्या राज्यातील पत्ता देऊन महागडे परफ्यूम मागविले. परंतु त्यानंतर बँकेकडे तक्रार करीत पेमेंट रोखून जळगावातील ऑनलाईन व्यावसाय चालकाची ग्राहकाने १ लाख २१ हजार रुपयांमध्ये फसवणूक केली. ही घटना दि. २९ मार्च ते दि. ६ एप्रिल दरम्यान घडली. या प्रकरणी शहर पोलिस ठाण्यात रवी कुमार नामक व्यक्तीविरुद्ध गुन्हा दाखल करण्यात आला आहे. आतापर्यंतच्या घटनांमध्ये ऑनलाईन प्लॅटफॉर्मचे नाव किंवा अमिष दाखवित ग्राहकाची फसवणूक होते. मात्र या घटनेमध्ये ग्राहकानेच ऑनलाईन प्रोडक्ट विक्री करणाऱ्या व्यावसायिकाला गंडविले.
मिळालेल्या माहितीनुसार, शहरातील आदर्शनगरातील रहिवासी विशाल विनोद जवाहराणी (वय २६) यांचे परफ्यूम्स बाय जनता शॉपी या नावाचा ऑनलाईन व्यवसाय आहे. वेबसाईटवरून ते ऑनलाईन परफ्यूमचा व्यवसाय करतात. दि. २९ मार्च रोजी रवी कुमार नामक व्यक्तीने मेलवरून ११ हजार १४८ रुपये किमतीचे तीन महागडे परफ्यूम ऑर्डर केले व भोपाळ येथील पत्ता दिला. त्यासाठी सदर व्यक्तीने आंतरराष्ट्रीय डेबीट व क्रेडीट कार्डचा वापर करून ‘रेझॉरपे’ द्वारे पेमेंट केले. त्यानुसार व्यावसायिकाने परफ्यूम पाठविल्यानंतर संबंधित समोरील व्यक्तीने दि. ४ एप्रिल रोजी स्वीकारले. परंतु त्यानंतर पुन्हा वारंवार अशा प्रकारे वेगवेगळ्या नावाने गुजरात, दिल्ली येथे महागडे परफ्यूम मागविले होते.
संबंधित ग्राहकाने परफ्यूमची ऑर्डर केल्यानंतर ऑनलाईन पेमेंट केले, मात्र संबंधिताने नंतर बँकेत तक्रार करून पेमेंट रोखले. त्यामुळे व्यावसायिकाला ती रक्कम मिळू शकली नाही. पेमेंट मिळत नसल्याने व्यावसायिकाने ‘रेझॉरपे’ कडून माहिती मागविली असता ऑर्डर करणारा इसम व पेमेंट करणारा यांची माहिती जळुत नसल्याचे समोर आले. फसवणूक झाल्याचे लक्षात आल्यानंतर विशाल जवाहराणी यांनी दि. १० एप्रिल रोजी शहर पोलिस ठाण्यात फिर्याद दिली. त्यावरून रवी कुमार नामक व्यक्तीविरुद्ध गुन्हा दाखल करण्यात आला आहे. पुढील तपास पोलिस निरीक्षक सागर शिंपी करीत आहेत
