जळगाव मिरर | २२ एप्रिल २०२६
निविदेची (टेंडर) ची गोपनीय माहिती देण्यास नकार दिल्याच्या रागातून संतापलेल्या व्यक्तीने सहाय्यक अभियंता संदीपकुमार बडगुजर यांच्या केबीनमध्ये शिरुन त्यांना मारहाण केली. ही घटना दि. २० एप्रिल रोजी दुपारच्या सुमारास महावितरणच्या दिक्षीतवाडी कार्यालयात घडली. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, जळगाव तालुक्यातील चिंचोली येथील रहिवासी संजय रामभाऊ वराडे हा दि. २० एप्रिल रोजी दुपारी १२ वाजेच्या सुमारास दिक्षितवाडी येथील महावितरण कार्यालयात गेला होता. त्या ठिकाणी त्याने सहाय्यक अभियंता संदीपकुमार रणछोड बडगुजर यांच्याकडे महावितरणकडन काढण्यात आलेल्या एका निविदेची माहिती मागितली. संबंधित निविदेची माहिती गोपनीय असल्याने ती देता येणार नाही, असे अभियंता बडगुजर यांनी स्पष्ट केले. याचाच राग आल्याने संजय वराडे याने बडगुजर यांच्याशी वाद घालण्यास सुरुवात केली. वादाचे रूपांतर पुढे धक्काबुक्कीत झाले. संशयित वराडे याने अभियंत्याची कॉलर पकडून त्यांना शिवीगाळ केली आणि त्यांच्या केबिनमधील महत्त्वाच्या फाईली अस्ताव्यस्त फेकून दिल्या केवळ गोंधळ घालूनच न थांबता, वराडे याने सहाय्यक अभियंता बडगुजर यांना चापटा-बुक्क्यांनी मारहाण केली. या अचानक झालेल्या प्रकारामुळे कार्यालयात काही काळ तणावाचे वातावरण निर्माण झाले होते.
या घटनेनंतर संदीपकुमार बडगुजर यांनी तात्काळ जिल्हापेठ पोलीस ठाणे गाठून फिर्याद दिली. त्यांच्या तक्रारीवरून संजय रामभाऊ वराडे याच्याविरुद्ध शासकीय कामात अडथळा निर्माण करणे आणि मारहाण केल्याप्रकरणी गुन्हा दाखल करण्यात आला आहे. पुढील तपास पोलीस उपनिरीक्षक संजय भांडारकर हे करत आहेत.
