जळगाव मिरर | १८ जुलै २०२६
कंपनीतून घरी जाणाऱ्या कामगारांच्या दुचाकीला भरधाव ट्रकने धडक दिली. या अपघातात शेखर ईश्वर सपकाळे (वय २५, रा. धामणगाव, ता. जळगाव) व पीयुष प्रदीप बेंडाळे (वय ४०, रा. अयोध्या नगर) हे दोघ गंभीर जखमी झाले. त्यांच्यावर शासकीय वैद्यकीय महाविद्यालय व रुग्णालयात उपचार सुरू आहेत. ही अपघाताची घटना शुक्रवार दि. १७ रोजी संध्याकाळी साडे सहा वाजेच्या सुमारास रेमंड चौफुलीजवळ घडली.
मिळालेल्या माहितीनुसार, एमआयडीसी परिसरातील एका कंपनीत कामाला असलेले शेखर सपकाळे व पीयुष बेंडाळे हे दुचाकीने कंपनीतून घरी जात असताना छत्रपती संभाजीनगरकडून जळगाव शहराकडे येणाऱ्या (टीएन ४७, एक्यू ८४०३) क्रमांकाच्या ट्रकने त्यांच्या दुचाकीला जोरदार धडक दिली. या अपघातात दोघ दुचाकीस्वार तरुण गंभीर जखमी झाले.
घटनेची माहिती मिळताच पोहेकॉ गिरीश पाटील व अन्य सहकारी घटनास्थळी पोहचले व त्यांनी नागरिकांच्या मदतीने जखमींना शासकीय वैद्यकीय महाविद्यालय व रुग्णालयात दाखल केले. धडक देणाऱ्या ट्रकसह चालकाला एमआयडीसी पोलिसांनी ताब्यात घेतले आहे.
