जळगाव मिरर । २२ जुलै २०२६
महावितरण कंपनीच्या भुसावळ शहर-१ कार्यालयातील अतिरिक्त कार्यकारी अभियंता नितीन अभिमन्यू पाटील (वय ५४) याला सोलर सिस्टीमच्या मंजुरीसाठी व रिलीज ऑर्डर देण्याच्या मोबदल्यात २ हजार रुपयांची लाच स्वीकारताना लाचलुचपत प्रतिबंधक विभागाने (एसीबी) रंगेहाथ पकडले. गुरुवारी (२२ जुलै) झालेल्या या कारवाईमुळे महावितरण विभागात एकच खळबळ उडाली आहे.
लाचलुचपत प्रतिबंधक विभागाने दिलेल्या माहितीनुसार, तक्रारदाराच्या पत्नीच्या नावे सोलर सिस्टीम बसविण्याची एजन्सी असून त्यांनी भुसावळ शहरातील दोन ग्राहकांसाठी सोलर सिस्टीम बसविली होती. या कामासाठी महावितरणकडे ऑनलाइन अर्ज सादर करण्यात आले होते. संबंधित प्रकरणातील मंजुरी व रिलीज ऑर्डर देण्याचे काम अतिरिक्त कार्यकारी अभियंता नितीन पाटील यांच्याकडे होते. मात्र, मंजुरी व रिलीज ऑर्डर देण्यासाठी पाटील यांनी प्रत्येक प्रकरणामागे १ हजार रुपये, अशा दोन प्रकरणांसाठी एकूण २ हजार रुपयांची लाच मागितल्याचा आरोप तक्रारदाराने केला. याबाबत तक्रारदाराने जळगाव येथील लाचलुचपत प्रतिबंधक विभागाकडे तक्रार दाखल केली.
तक्रारीची पडताळणी केल्यानंतर एसीबीने गुरुवारी सापळा रचला. त्यावेळी अतिरिक्त कार्यकारी अभियंता नितीन पाटील यांनी तक्रारदाराकडून २ हजार रुपयांची लाचेची रक्कम स्वीकारताच पथकाने त्यांना रंगेहाथ ताब्यात घेतले. या प्रकरणी भुसावळ शहर पोलीस ठाण्यात भ्रष्टाचार प्रतिबंधक अधिनियम, १९८८ मधील कलम ७ अन्वये गुन्हा दाखल करण्याची प्रक्रिया सुरू असून पुढील तपास सुरू आहे.
या कारवाईचे पर्यवेक्षण पोलीस उपअधीक्षक योगेश ठाकूर यांनी केले. सापळा अधिकारी म्हणून पोलीस निरीक्षक रेश्मा अवतारे यांनी काम पाहिले. त्यांच्या पथकातील अधिकारी व कर्मचाऱ्यांनी ही यशस्वी कारवाई केली. या कारवाईस वरिष्ठ अधिकाऱ्यांचे मार्गदर्शन लाभले.
