जळगाव मिरर | १३ ऑगस्ट २०२६
पाचोरा तालुक्यातील आंबेवडगाव येथे देवदर्शन करून परतणाऱ्या भाविकांच्या बोलेरो पिकअप वाहनाला पाचोराकडून जाणाऱ्या स्विफ्ट कारने जबर धडक दिल्याची घटना ११ ऑगस्टला रात्री ११.३० वाजेच्या सुमारास घडली. या अपघातात १२ भाविक जखमी झाले असून, त्यापैकी सहा जण गंभीर जखमी झाल्याची माहिती आहे. उर्वरित सहा जणांना किरकोळ दुखापत झाली आहे.
मिळालेल्या माहितीनुसार, पाचोरा तालुक्यातील आंबेवडगाव येथील बंजारा समाजातील भाविक सिन्नर तालुक्यातील वडांगडी येथे देवदर्शनासाठी गेले होते तेथून परततांना पाचोरा ते भडगाव दरम्यान हा अपघात घडला. अपघातातील गंभीर जखमींमध्ये संजय पवार (वय ५०), अविनाश पवार (वय २४), सुनील राठोड (वय २७), सुपडुबाई ईश्वर पवार (वय ४०), उज्ज्वलाबाई सुनील राठोड (वय २२) आणि मीराबाई सरिचंद राठोड (वय ६०) यांचा समावेश आहे. एकूण १२ भाविक या वाहनातून प्रवास करत होते. तर ६ भाविकांना किरकोळ इजा झाली आहे. अपघातानंतर जखमींना तातडीने भडगाव येथील प्राथमिक आरोग्य केंद्रात दाखल करण्यात आले.
तेथे डॉ. पंकज जाधव यांनी प्रथमोपचार केलेत. त्यानंतर पुढील उपचारासाठी सर्व जखमींना पाचोरा येथील विघ्नहर्ता हॉस्पिटलमध्ये दाखल करण्यात आले आहे. तेथे डॉ. सागर गरुड यांनी जखमींवर उपचार केलेत. दरम्यान, काँग्रेसचे तालुकाध्यक्ष सचिन सोमवंशी यांनी तातडीने रुग्णालयात भेट देऊन जखमींची विचारपूस केली. तसेच त्यांच्या प्रकृतीची माहिती जाणून घेतली. अपघातातील जखमींवर सध्या उपचार सुरू आहे. तर हा अपघात नेमका कसा घडला, याबाबत पोलीस तपास करत आहेत.
